विराटनगर । अन्तर्राष्ट्रिय मैत्रीपूर्ण खेलमा ब्राजिल र स्पेन ३-३ गोलको बराबरीमा रोकिएका छन् ।
सान्टियागो बर्नबेउ मड्रिडमा मंगलबार राति भएको खेलमा ब्राजिल घरेलु टोली स्पेनलाई बराबरी रोक्न सफल भएको हो ।
ब्राजिलले खेलमा दुईपटक पछि परेको स्थिति उल्टाउँदै स्पेनलाई रोकेको हो ।
ब्राजिलका लागि लुकास पाक्वेटाले खेलको ९६औं मिनेटमा पेनाल्टीमार्फत गोल गर्दै ब्राजिललाई हारबाट बचाएका थिए ।
यसअघि ब्राजिलका लागि रोड्रीगो र युवा खेलाडी एनड्रिकले एक एक गोल गरेका थिए । त्यसैगरी स्पेनका लागि रोड्रीले पेनाल्टीमार्फत दुई गोल गरेका थिए भने डानी ओल्मोले एक गोल गरेका थिए ।
खेलको १२औँ मिनेटमा स्पेनले पेनाल्टीमार्फत् खेलमा अग्रता बनाएको थियो । पेनाल्टी बक्समा लमिन यमललाई जोआओ गोमेजले फउल गरे स्पेनले पेनाल्टी पाएको थियो । जसमा रोड्रीले गोल गरे ।
३६औँ मिनेटमा ड्यानी ओल्मोले गोल गर्दै स्पेनको अग्रता दोब्बर पारे । त्यसको चार मिनेटपछि रोड्रिगोले गोल गर्दै खेललाई २–१ को स्थितिमा ल्याए ।
५०औँ मिनेटमा एन्ड्रिकले गोल गर्दै खेललाई २–२ गोलको बराबरीमा ल्याए । ८७औँ मिनेटमा रोड्रीले पेनाल्टीमा गोल गर्दै स्पेनलाई ३–२ गोलको अग्रता दिलाए ।
तर, इन्ज्युरी समयको थप गरिएको छैटौँ मिनेटमा लुकासले पेनाल्टीमा गोल गर्दै ब्राजिललाई हारबाट जोगाए ।
