विराटनगर । आउँदो चैत्र ९ गते देश तथा विदेशमा एकैसाथ प्रदर्शन हुने चलचित्र ‘महाजात्रा’ को प्रिमियर शो झापाको बिर्तामोडमा हुने भएको छ ।
महाजात्रा टिमले मंगलबार विराटनगरमा पत्रकार सम्मेलन गर्दै चलचित्रको प्रिमियर शोबारे जानकारी दिएका हुन् ।
चलचित्र रिलिज हुनुअघि पोखरामा पनि विशेष प्रर्दशनीको व्यवस्था मिलाइएको महाजात्रा टिमले जनाएको छ ।
टिमका अनुसार ‘जात्रा’ र ‘जात्रैजात्रा’ को अपार सफलतापछि चलचित्रको अर्को सिक्वेल महाजात्रा निर्माण गरिएको हो ।
चलचित्रमा देशको वर्तमान राजनीतिक परिवेश, आर्थिक मन्दी र बेरोजगारीको समस्यालगायतका विषयवस्तुलाई समेट्न खोजिएको छ ।
चलचित्रले देशको समसामयिक मुद्दालाई मनोरञ्जनात्मक तरिकाले प्रस्तुत गर्ने प्रयास गरेको कलाकार हरिवंश आचार्यले बताए ।
रविन्द्र सिंह बानियाँ कार्यकारी निर्माता रहेको चलचित्र प्रदीप भट्टराईको निर्देशनमा निर्माण भएको हो ।
चलचित्रमा हरिवंश आचार्य, विपिन कार्की, रविन्द्र झा, वर्षा राउत र राजाराम पौडेल लगायतका कलाकारहरुले मुख्य भूमिका छ ।
चलचित्रमा विगतका दुई सिक्वेलमा गरिएका स–साना कमी कमजोरीलाई समेत सच्याइएको बताउँदै कलाकार विपिन कार्कीले यसअघिका सिक्वेलभन्दा अब्बल बनेको दाबी गरे ।
यही चैत्र ९ गतेदेखि देश तथा विदेशमा एकैसाथ प्रर्दशन हुन लागिरहेको चलचित्र महाजात्रा यसअघि प्रर्दशन भइसकेका ‘जात्रैजात्रा’ र ‘जात्रा’ कै तेस्रो सिक्वेल हो ।
यस सिक्वेलको पहिलो चलचित्र ‘जात्रा’ ७ वर्षअघि २०७३ कात्तिकक २६ गते प्रर्दशन भएको थियो ।
चलचित्रको दोश्रो सिक्वेल ‘जात्रैजात्रा’ भने २०७६ जेठ ३ गते देशैभरि प्रर्दशनमा आएको थियो ।
