विराटनगर । आगामी माघ ११ गते हुने राष्ट्रियसभा निर्वाचनका लागि कोशी प्रदेशबाट नेकपा माओवादी केन्द्रकी चम्पादेवी कार्कीले उम्मेदवारी दर्ता गराएकी छन् ।
सोमबार विराटनगरस्थित निर्वाचन अधिकृतको कार्यालय पुगेर कार्कीले उम्मेदवारी दर्ता गराएकी हुन् ।
कार्कीले गठबन्धनको तर्फबाट राष्ट्रियसभा निर्वाचनको लागि कोशी प्रदेशको महिला कोटामा उम्मेदवारी दिएकी छन् ।
कार्कीको प्रस्तावकमा माओवादी केन्द्रका प्रदेशसभा सदस्य गणेशप्रसाद उप्रेती र समर्थकमा नेपाली कांग्रेसका प्रदेशसभा सदस्य रामकुमार खत्री छन् ।
हाल ओखलढुंगाको सुनकोशी गाउँपालिका–५ की बासिन्दा रहेकी कार्की २०५४ सालको स्थानीय निर्वाचनमा वडा सदस्यमा निर्वाचित भएकी थिइन् ।
नेकपा एमालेबाट साविक मूलखर्क गाविस वडा नम्बर ६ मा महिला सदस्यका रूपमा निर्वाचित भएको करिब २६ वर्षपछि उनी राष्ट्रियसभामा पुग्न लागेकी हुन् ।
सत्तारूढ गठबन्धनकी साझा उम्मेदवार भएको कारण उनी राष्ट्रियसभा सदस्य हुने करिब–करिब निश्चित देखिएको छ ।
प्रदेशमा गठबन्धनको मतभार प्रतिस्पर्धी एमालेभन्दा फराकिलो अन्तरले धेरै रहेकोले उनको विजय करिब निश्चित जस्तै छ ।
ओखलढुंगाको मुलखर्ककी ५० वर्षीया कार्की अहिले माओवादी केन्द्रीय सदस्य र ओखलढुंगा जिल्ला इनचार्जसमेत हुन् ।
कार्की अनेम संघ क्रान्तिकारी केन्द्रीय कमिटीकी सचिव पनि हुन् ।
२०५४ सालमा वडा सदस्य भएपनि कार्यकाल पूरा नगर्दै २०५६ बाट माओवादी जनयुद्धमा होमिएकी कार्की तीनपटक समानुपातिक उम्मेदवार सूचीमा परेकी थिइन् ।
तथापि, उनले माननीय हुन मौका पाइनन् ।
जनयुद्धको घाइते योद्धा पनि भएकोले उनलाई उम्मेदवार बनाउने निर्णयले माओवादी कार्यकर्ता पंक्तिले पनि न्यायको रूपमा लिएको छ ।
कार्कीका प्रस्तावकसमेत रहेका गणेश उप्रेतीले भने, ‘उहाँ पार्टीमा लामो समयदेखि सक्रिय रहनुभएको नेता हुनुहुन्छ । उहाँले लडाइँमा हात गुमाउनुभयो ।’
‘आकांक्षी स्वाभाविक रूपमा धेरै हुन्छौं, अवसर पाउने थोरै हुन्छौं,’ कोशी प्रदेशका पर्यटनमन्त्रीसमेत रहेका उप्रेतीले थपे, ‘पार्टीको पुरानो र इमानदार योद्धालाई उम्मेदवार बनाउने विषयले उहाँको योगदानको कदर भएको छ ।’
संविधानसभाको दुईवटै निर्वाचन र गत प्रतिनिधिसभा निर्वाचनमा समानुपातिक उम्मेदवार रहेकी उनको नाम बन्दसूचीमै सीमित भएको थियो ।
बन्दसूचीबाट नाम फिर्ता लिएर बसेकी कार्की यसपटक भने राष्ट्रियसभाको सुरक्षित निर्वाचनको उम्मेदवार बनेकी हुन् ।
कार्की जनयुद्धमा छापामार बनेर युद्ध लडेकी घाइते योद्धासमेत हुन् ।
जनयुद्धमा भएको लडाइँको क्रमाम उनले आफ्नो दाहिने हात गुमाएकी छिन् ।
२०५७ को वैशाखमा छापामारका रूपमा ‘होलटाइमर’ बनेर जनयुद्धमा होमिएकी उनी २०५८ सालमा रामेछापको धोवीचौकी मोर्चामा घाइते भएकी थिइन् ।
त्यही लडाइँमा उनको हात गुमेको हो ।
ओखलढुंगाको ‘ब्लकिङ’मा खट्दा आफ्नो हात गुमेको स्मरण गर्दै उनले भनिन्, ‘मोर्चामा म पनि संलग्न थिएँ । ओखलढुंगामा ब्लकिङमा खटिँदा म बम आक्रमणमा परेँ र मेरो दाहिने हात गुम्यो ।’
कार्कीका श्रीमान् खड्ग योगी पनि माओवादीको सक्रिय राजनीतिमा छन् ।
