विराटनगर । नेपाली कांग्रेसका नेता डा. शेखर कोइरालाले मुलुकलाई अफ्ठेरो परिस्थितिबाट माथि उकास्न कांग्रेस र एमाले एक हुनुपर्ने बताएका छन् ।
बिहीबार विराटनगर विमानस्थलमा सञ्चारकर्मीसँग संक्षिप्त कुरा गर्दै डा. कोइरालाले मुलुकको स्थिरता र विकासका लागि कांग्रेस–एमाले एक ठाउँमा उभिनुपर्ने बताएका हुन् ।
वर्तमान एमाले–माओवादी सम्मिलित गठबन्धनबाट मुलुकमा आर्थिक विकासको सम्भावना न्युन रहेको बताउँदै पार्टीको केन्द्रीय सदस्यसमेत रहेका डा. कोइरालाले राजनीतिक स्थायित्व र आर्थिक समृद्धिका लागि एमाले र कांग्रेस मिल्नुको अन्य कुनै विकल्प नरहेको धारणा व्यक्त गरे ।
डा. कोइरालाले एमाले र कांग्रेस नमिलेकै कारण मुलुकमा राजनीतिक अस्थिरता पैदा भएको बताए ।
अहिले हरेक प्रदेशमा मुख्यमन्त्रीले राजीनामा गर्नुपर्ने वा विश्वासको मत लिनुपर्ने वातावरण पनि एमाले र कांग्रेस नमिलेकै कारण उत्पन्न भएको उनको जिकिर छ ।
तथापि, कोशी प्रदेशको अंकगणित भने अन्य प्रदेशको भन्दा भिन्न रहेकाले यहाँ मुख्यमन्त्रीले दुई वर्षसम्म विश्वासको मत लिन नपर्ने दाबी गरे ।
डा. कोइराला मोरङ व्यापार संघको ६७औं वार्षिक साधारणसभा कार्यक्रममा सहभागी हुन विराटनगर आएका हुन् ।
