विराटनगर । पर्यटकीय नगरी इलामको सूर्योदय नगरपालिकामा यसै वैशाख २१-२२ गते ‘ओलम्पियन मिट’ आयोजना हुने भएको छ ।
खेल र खेलाडीका माध्यमबाट पर्यटन प्रवर्द्धन गर्ने उद्देश्यले आयोजना हुन लागेको ओलम्पियनको भ्रमणमा नेपालबाट प्रतिनिधित्व गरेका ४० र विदेशका १० ओलम्पिक खेलाडी तथा खेल पदाधिकारीहरूको सहभागिता रहने छ ।
इटहरीमा आगामी वैशाख २० गते हुने ‘तेस्रो ओलम्पियन्स पुनर्मिलन तथा स्पोर्टस् सेलिब्रेटी मिट’ पछि ओलम्पियनहरू इलाम पुग्ने भएका हुन् ।
सन् १९६४ देखि हालसम्मका ओलम्पियन खेलाडी, अन्तर्राष्ट्रिय ओलम्पियन एसोसिएसन अध्यक्ष र सदस्य, कोशी प्रदेशका सेलिब्रेटी खेलाडी २५ तथा विभिन्न मिडियामा आबद्ध १५ पत्रकार सहभागी हुनेछन् ।
प्रदेश खेलकुद बोर्डको आयोजना, नेपाल ओलम्पियनन्स एसोसिएसनको संयोजन, सूर्योदय नगरपालिकाको स्थानीय व्यवस्थापन तथा जिल्ला खेलकुद विकास समितिको समन्वयमा कार्यक्रम आयोजना गर्न आँटिएको हो ।
विराटनगरबाट वैशाख २१ गते दिउँसो यी खेलाडीको टोली कन्याम पुग्नेछ । २२ गते बिहान अन्तुडाँडाबाट दृश्यावलोकन गर्दै परिचयात्मक कार्यक्रम राखिएको छ ।
त्यसपछि उनीहरूलाई नगरपालिकाले अभिनन्दन गर्ने र सबैले फोटो सेसन गर्ने कार्यक्रम राखिएको नगरले जनाएको छ ।
