विराटनगर । विराटनगरको अग्रणी शैक्षिक संस्था शिक्षादीप कलेजले दोस्रो जलवायु सम्मेलनको आयोजना गरेको छ ।
शुक्रबार विराटनगर महानगरपालिका–९ स्थित आफ्नै सभाहलमा कलेजले दोस्रो पटक जलवायु सम्मेलनको आयोजना गरेको हो ।
शिक्षादीपको कक्षा ११ मा जीवविज्ञान विषय लिएर पढ्ने विद्यार्थीहरूले सम्मेलनमा जलवायु र वातावरण प्रदूषणसँग सम्बन्धित जल्दोबल्दो मुद्दामा प्रस्तुतीकरण गरेका थिए ।
विद्यालयदेखि समाजसम्म सचेतना फैलाउने उद्देश्यका साथ ‘स्मल एक्ट, बिग इम्प्याक्ट’ अर्थात् सानो प्रयासबाट ठुलो प्रभाव पार्न सकिने नाराका साथ विद्यार्थीहरूले प्रस्तुतीकरण गरेका थिए ।
सम्मेलनकी प्रमुख अतिथि नेपाल विज्ञान तथा प्रविधि प्रज्ञा प्रतिष्ठान (नास्ट) की सह–प्राज्ञ डा. ईन्द्रमणि भगतले शिक्षादीपले आफ्नो कलेजका विद्यार्थीहरूलाई सहभागी गराएर उत्कृष्ट सम्मेलन आयोजना गरेको बताइन् ।
विद्यार्थीहरूले खोज–अनुसन्धानबाट वातावरण क्षेत्रका समस्या र समाधानका उपायहरूसमेत आफ्नो प्रस्तुतिकरणमा समावेश गरेर वातावरण संरक्षणमा योगदान गरेको बताइन् ।
उनीहरूले गहिरो खोज तथा अनुसन्धानबाट विषय छनोट गरी मिचाहा प्रजातिका वनस्पति, अम्लीय वर्षा, तापमान वृद्धि, प्लास्टिक प्रदूषण, खाद्य सुरक्षा, ओजन तहको विनाशलगायत आठवटा विषयमा खोजमूलक प्रस्तुतिकरण गरेका थिए ।
अतिरिक्त क्रियाकलापअन्तर्गत अघिल्लो वर्ष आयोजित पहिलो जलवायु सम्मेलन प्रभावकारी भएका कारण निरन्तरतास्वरूप सम्मलेनको आयोजना गरिएको कलेजले जनाएको छ ।
कलेजका प्रिन्सिपल ज्ञानबहादुर खड्काले विद्यार्थीहरूलाई वातावरणको क्षेत्रमा धेरै ठुलो चासो रहेको बताउँदै सम्बन्धित निकायको ध्यान आकृष्ठ हुनेगरी सम्मलेनको आयोजना गरिएको सुनाए ।
जलवायु परिवर्तन विश्वव्यापी समस्या भएका कारण सम्बन्धित निकायलाई झकझक्याउने प्रयास विद्यार्थीले गरेको प्रिन्सिपल खड्काको भनाइ छ ।
सम्मेलनमा शिक्षादीप कलेजका अध्यक्ष तथा कोशी प्रदेशसभा सदस्य भीम पराजुली, कलेजका सह–प्राध्यापक शैलेन्द्र शिवाकोटी, चिफ डाइरेक्टर रमेशकुमार मण्डल, कन्भेनर डा. ललित नारायण मण्डर, एलिजा आचार्य शिवाकोटी, विज्ञान संकाय प्रमुख नवीनकुमार रायलगायत विभिन्न संकायका प्रमुखहरू, सञ्चालक समितिका सदस्यहरूको उपस्थिति रहेको थियो ।
कोशी प्रदेशभित्र कक्षा ११ मा सबैभन्दा बढी विद्यार्थी भर्ना हुने कलेजको रूपमा चिनिएको शिक्षादीपले प्रत्येक वर्ष उत्कृष्ट नतिजा ल्याउँदै आएको छ ।
