विराटनगर । कोसी प्रदेशका मुख्यमन्त्री केदार कार्कीले आइतबार बिहान तमु ल्होसारको शुभकामना सन्देश जारी गरे ।
गुरुङ समुदायले मनाउने तमु ल्होसारको शुभकामना दिँदै सन्देश जारी गर्दा मुख्यमन्त्री कार्कीले कोसी प्रदेश लेख्न छुटाएका थिए ।
जसकारण मुख्यमन्त्रीले प्रदेशको नाम लेख्न बिर्सिएको भन्दै सर्वत्र आलोचना भयो ।
आफ्नोसमेत मतले प्रदेश १ लाई कोसी प्रदेश नामाकरण गर्न योगदान गरेका कार्कीले मुख्यमन्त्री भएपछि प्रदेशको नाम उल्लेख नगरी तमु ल्होसारको शुभकामना दिएको भन्दै आलोचना भएको थियो ।
पूर्वी नेपालमा पहिचानबादी आन्दोलन जारी रहेको बेला उनीहरूको मागलाई ‘सम्मान गर्दै’ कोसी प्रदेश उल्लेख नगरेको हुनसक्ने अनुमान गरिएको छ ।
संविधान र राज्यले चिन्ने मुख्यमन्त्री पदको जिम्मेवारीमा रहेका कार्कीले कोसी प्रदेशको नाम उल्लेख नगरेपछि यस घटनालाई अर्थपूर्ण रूपमा हेरिएको छ ।
सबैतिर विरोध र टीका-टिप्पणी हुन थालेपछि मुख्यमन्त्री कार्कीको सचिवालयले सच्याएर पुन: शुभकामना सन्देश जारी गरेको छ ।
