एजेन्सी । अमेरिकन अभिनेता तथा फिल्म निर्माता विन डिजेलमाथि यौन दुर्व्यवहारको मुद्दा परेको छ ।
हलिउड अभिनेता डिजेलकी एक पूर्वनिजी सहायक एस्टा जोनासनले यौन दुर्व्यवहारको आरोप लगाउँदै उनीविरुद्ध उजुरी दिएकी हुन् ।
सन् २०१० मा ‘फास्ट फाइभ’को सुटिङको क्रममा डिजेलले आफूमाथि यौन दुर्व्यवहार गरेको जोनासनको आरोप छ ।
बिहीबार लस एन्जलसमा सो मुद्दा दायर गरिएको बताइएको छ ।
‘फास्ट फाइभ’को छायाङ्कनको क्रममा एटलान्टाको सेन्ट रेजिस होटलमा सो घटना भएको उनको दाबी छ ।
डिजेलले भित्तामा अडेस लगाएर आफूमाथि यौन क्रियाकलाप गरेको जोनासनले प्रहरीसमक्ष बयान दिएकी छन् ।
यौन दुर्व्यवहार गरेको केही घण्टापछि अभिनेता डिजेलको कम्पनीले आफूलाई गलत गरिकाले कम्पनीबाट निष्कासन गरेकोसमेत उनको आरोप छ ।
ती सहायकले अभिनेता डिजेलकी बहिनी र उनको कम्पनी वान रेस फिल्म्सविरुद्ध पनि मुद्दा दायर गरेकी छन् ।
तथापि, अभिनेताका वकिल मार्क सिन्क्लेयरले डिजेलले उक्त दाबीलाई पूर्ण रूपमा अस्वीकार गरेको बताएका छन् ।
