काठमाडौँ । राष्ट्रिय फुटबल टिमका गोलरक्षक विशाल श्रेष्ठले राष्ट्रिय टोलीबाट सन्यास लिने घोषणा गरेका छन् ।
नेपाल सुपर लिगमा चितवनबाट खेलिरहेका श्रेष्ठले झापासँगको खेलपछि सन्यासको घोषणा गरेका हुन् ।
शुक्रबार साँझ उनले पत्रकार सम्मेलन गरी राष्ट्रिय टोलीबाट अलग्गिने घोषणा गरे ।
साफ च्याम्पियनसिपपछि नै सन्यासको बारेमा सोचेको भए पनि अहिले सही समय भएकाले सन्यास घोषणा गरेको उनको भनाइ छ ।
एक दशकको प्रतीक्षापछि उनले २०७८ सालको भदौमा दशरथ रङ्गशालमा घरेलु समर्थकमाझ भारतसँगको खेलमा राष्ट्रिय टिमका लागि डेब्यु गरेका थिए ।
राष्ट्रिय टिमका लागि त्यो नै उनको पहिलो र अन्तिम खेल हो ।
बारम्बार घरेलु फुटबलको शीर्ष लिग जितिसकेका अनि लिगको उत्कृष्ट गोलकिपर बनेका विशालले नियमित जसो राष्ट्रिय टिममा परे पनि खेल्न पाउने गरेका थिएनन् ।
२०५९ मा एन्फा एकेडेमीमा आवद्ध भएका उनी खेलाडीका रूपमा २०६६ सालसम्म त्यहीं रहे ।
यसकै प्रतिनिधित्व गर्दै केही घरेलु प्रतियोगिता पनि खेले । त्यहाँबाट निस्केयता उनको पहिलो क्लब रह्यो, मनाङ मर्स्याङ्दी ।
मनाङको पहिलो रोजाइका गोलरक्षकका रूपमा उनी त्यहाँ १० वर्षजति रहे ।
उनले शहीद स्मारक लिग ‘ए’ मा मनाङका लागि वर्ष ०६६/०६७ को संस्करणमा डेब्यु गरे ।
त्यसपछि घरेलु फुटबलमा उनको अर्को क्लब रह्यो, मछिन्द्र । उनी ०७६ सालदेखि मछिन्द्रमा आबद्ध छन् ।
नेपाल सुपर लिग एनएसएलमा यसपालि चितवन एफसीमा मार्की खेलाडीका रूपमा आबद्ध भएका उनी कप्तान पनि हुन् ।
उनले पहिलो संस्करणको एनएसएलमा बुटवल–लुम्बिनी एफसीका लागि खेलेका थिए ।
