विराटनगर । विराटनगरका अग्रणी उद्यमी राजेन्द्र राउतले दुई अर्ब ५० करोडको लगानीमा आरआर इन्टरनेसनल अस्पताल खोल्ने भएका छन् ।
राउतले बुधबार दिउँसो मोरङको बूढीगङ्गा गाउँपालिका-१ मा २०० शय्याको मल्टिस्पेसियालिटी अस्पताल शिलान्यास गरेका हुन् ।
आफ्नै कम्पनी राउत कन्ट्रक्सनको परिसरभित्र रहेको १८ कट्ठा जमिनमा राउतले आरआर इन्टरनेसनल हस्पिटल निर्माण गर्न आँटेका हुन् ।
शिलान्यासपछि पत्रकार सम्मेलन आयोजना गरी राउतले कोसी राजमार्गसँगै जोडिएको जमिनमा निर्माण हुने अस्पतालले गुणस्तरीय उपचारको लागि काठमाडौं र भारत जानुपर्ने बाध्यता टर्ने दाबी गरेका छन् ।
अबको २४ महिनाभित्र प्रारम्भिक निर्माण सम्पन्न गरेर २६औं महिनामा अस्पतालको सफ्ट ओपनिङ गर्ने राउतको योजना छ ।
राउतले १०० शय्याबाट अस्पतालको सञ्चालन सुरु गर्ने र केही समयमै २०० शय्यामा विस्तार गरिने जानकारी दिए ।
अस्पताल ३०० शय्यासम्म विस्तार गर्ने योजना राखिएको छ । आरआर इन्टरनेसल अस्पतालका निर्देशक प्रतीक राउतका अनुसार प्रारम्भमा एक सय शैय्याबाट सुरु हुने छ ।
अस्पतालले मुटुरोगको उपचारलाई प्राथमिकतामा राखेर २४ सै घण्टा कार्डियाक इमर्जेन्सी र क्याथ ल्याब सेवा उपलब्ध गराउने राउतले बताए ।
अस्पतालबाट जनरल मेडिसन, न्यूरो सर्जरी, जनरल सर्जरी, मृगौला रोग, मुत्ररोग, स्त्रीरोग तथा प्रसुती सेवा, आँखा रोग, नवजात शिशु तथा बालरोग, हाडजोर्नी तथा नशाको विशिष्टिकृत उपचार सेवा उपलब्ध गराउने योजना राखिएको छ ।
यसैगरी सबै किसिमका शल्यक्रिया आधुनिक र विश्वसनीय प्रविधि तथा उपकरणको माध्यमबाट हुने गरी पूर्वाधार सुनिश्चित गरिने बताइएको छ ।
अस्पतालमा स्वास्थ्य सेवामा रोगको पहिचानलाई ध्यानमा राख्दै ‘डाइगोनेस्टिक डिपार्ट’ लाई अन्तर्राष्ट्रियस्तरको बनाउने राउतको योजना छ ।
सिमेन्ट र जुत्ताचप्पल उद्योग सञ्चालन गरिरहेको राउत नेतृत्वको शिवम् ग्रुपले मारुती सिमेन्ट उद्योगका लागि चुनढुङ्गा खानी सञ्चालन गरिरहेको छ ।
ग्रुपले हेभी इक्विपमेन्टको रेन्टल कारोबार र पेट्रोलियम व्यवसाय पनि सञ्चालन गर्दै आएको छ ।
राउत नेपाल उद्योग वाणिज्य महासङ्घको कोसी प्रदेश अध्यक्ष, महासङ्घको स्थायी समिति सदस्यसमेत रहेका छन् ।
उनी सार्क चेम्बर अफ कमर्सका कार्यसमिति सदस्य पनि हुन् ।
