यसै वर्ष कतारमा आयोजना हुने फिफा विश्वकपमा छनोट हुने राष्ट्रको सङ्ख्या २९ पुगेको छ ।
बिहीबार बिहान उत्तर तथा मध्य अमेरिका महादेशबाट मेक्सिको र अमेरिका छनोट भएसँगै विश्वकपमा छनोट हुने देशहरूको सङ्ख्या २९ पुगेको हो ।
विश्वकप फुटबलको अमेरिकी छनोटतर्फ अन्तिम चरणको खेलमा कोस्टारिकासँग २–० गोलले पराजित भए पनि शीर्ष तीनभित्र पर्दै विश्वकपमा छनोट भयो ।
मेक्सिकोले दोस्रो स्थानमा रहेर कतार यात्रा तय गरेको हो ।
मेक्सिकोले भने अन्तिम चरणको खेलमा एल साल्भडरलाई २–० गोलले हरायो ।
सन् २०२२ को विश्वकप आगामी नोभेम्बर २१ देखि डिसेम्बर १८ सम्म कतारमा हुँदै छ ।
जसमा विश्वभरिबाट सहभागी हुने ३२ टोलीमध्ये २९ वटा राष्ट्रको टुङ्गो लागेको छ ।
अब, तीन देशको छिनोफानो हुन बाँकी छ ।
विश्वकपमा युरोपटबाट १३, अफ्रिकाबाट पाँच, एसियाबाट चार र (प्लेअफबाट एक प्लस), कोन्काफबाट तीन (प्लेअफबाट एक प्लस), ओसियानाबाट (प्लेअफबाट एक प्लस ) र कन्मेवलबाट चार (प्लेअफबाट एक प्लस) छनोट हुने प्रावधान छ ।
विश्वकपको इतिहासमै पहिलोपटक विश्वकपका खेलहरू जाडो महिनामा आयोजना हुँदै छ ।
अघिल्लो पटक सन् २०१८ मा रसियामा भएको विश्वकप गर्मीयाम (१४ जुनदेखि १५ जुलाई) मा आयोजना भएको थियो ।
कुन महादेशबाट कुन राष्ट्र छानिए ?
युरोप
युरोपबाट विश्वकपका लागि अहिलेसम्म १२ राष्ट्र छानिएका छन् ।
अब युरोपबाट विश्वकपमा छनोट हुने एक टिमको टुङ्गो लाग्न बाँकी छ ।
जुनमा हुने स्कटल्यान्ड र युक्रेनबीच खेलको हुने छ । यो खेलको विजेताले वेल्ससँग भिड्ने छ ।
त्यसको विजेता टिम विश्वकपमा छानिने छ ।
युरोपबाट साविक विजेता फ्रान्स अपराजित रहँदै समूह ‘डी’ विजेताका रूपमा विश्वकपमा छनोट भयो ।
त्यसअघि नै जर्मनी विश्वकपमा छनोट भइसकेको थियो ।
चार पटकको विजेता जर्मनी विश्वकप २०२२ का लागि सबैभन्दा सुरुमा छनोट भएको राष्ट्र हो ।
ऊ समूह ‘जे’ को विजेताको रूपमा ११ अक्टोबरमा छनोट भएको थियो ।
यसपछि डेनमार्क, बेल्जियम, क्रोएसिया, स्पेन, सर्बिया, इङ्ग्ल्यान्ड, स्विट्जरल्यान्ड, नेदरल्यान्ड्स, पोर्चुगल र पोल्यान्ड विश्वकपमा छनोट भएका हुन् ।
दक्षिण अमेरिका
दक्षिण अमेरिकन राष्ट्रतर्फ सर्वाधिक धेरै पटकको विजेता टिम ब्राजिल सबैभन्दा सुरुमा विश्वकपमा छनोट भएको हो ।
पाँच पटकको विश्वविजेता ब्राजिल लगातार २२औँ पटक विश्वकपमा छनोट भएको हो ।
राउन्ड रोबिनका आधारमा भएको दक्षिण अमेरिकन छनोटतर्फ अपराजित रहँदै शीर्ष स्थानमा रहन सफल ब्राजिल ११ नोभेम्बरमा छनोट भएको हो ।
यस्तै, अर्जेन्टिना छनोटको दोस्रो स्थानमा रहँदै विश्वकपमा छनोट हुँदा उरुग्वे तेस्रो र इक्वाडर चौथो स्थानमा रहँदै छनोट भएको हो ।
दक्षिण अमेरिकाबाट छनोटमा शीर्ष चारमा रहने टोलीले विश्वकपमा सीधै छनोट हुने प्रावधान छ ।
पाँचौँ हुने टोलीले प्ले अफ खेल्नुपर्ने छ ।
यसैले दक्षिण अमेरिकी छनोटमा पाँचौँ स्थानमा रहेको पेरुले अन्तरमहादेशीय प्लेअफ खेल्ने भएको छ ।
पेरुले अन्तरमहादेशीय प्लेअफमा एसियन प्लेअफको विजेतासँग विश्वकपमा पुग्न प्रतिस्पर्धा गर्ने छ ।
उत्तर तथा मध्य अमेरिका (कन्काफ)
कन्काफ क्षेत्रको छनोटअन्तर्गत शीर्ष तीन टोली सीधै विश्वकपमा छानिनेछन् ।
जसअन्तर्गत क्यानडा जमैकालाई हराएर ३६ वर्षपछि विश्वकपमा छानिएको छ ।
यस्तै, दोस्रो स्थानमा रहँदै मेक्सिको र अमेरिका छनोट भइसकेका छन् ।
कोस्टारिकाले भने अन्तरमहादेशीय प्ले अफमा ओसियाना क्षेत्रको विजेता टिम न्युजिल्यान्डसँग फाइनलमा प्रतिस्पर्धा गर्नुपर्ने छ ।
यो खेलको विजेता टिमले कतार विश्वकपमा स्थान बनाउने छ ।
अफ्रिका
अफ्रिकाबाट विश्वकप खेल्ने पाँचै टोलीको छिनोफानो भइसकेको छ ।
घाना, सेनेगल, ट्युनिसया, मोरोक्को र क्यामरुन गरी पाँच टिमले कतार यात्रा तय गरेका हुन् ।
एसिया
एसियाबाट पाँच टोलीले सीधा र एक टोलीले अन्तरमहादेशीय प्लेअफ जितेर विश्वकपमा आफ्नो स्थान तय गर्छन् ।
एसियाकै कतारले आयोजकका रूपमा विश्वकपमा स्थान बनाइसकेको छ ।
त्यसबाहेक इरान, दक्षिण कोरिया, साउदी अरेबिया र जापानले विश्वकपमा स्थान तय गरिसकेका छन् ।
एसियाबाट छनोटको दोस्रो चरणको खेलमा नेपालले पनि प्रतिस्पर्धा गरेको थियो ।
तर अधिकांश खेलमा पराजित भएसँगै नेपाल तेस्रो चरणमा पुग्न असफल भयो ।
दोस्रो चरणको शीर्ष स्थानमा रहेका टोलीले तेस्रो चरणको खेल खेले ।
तेस्रो चरणबाट दुवै समूहको शीर्ष दुई टोली सीधा छानिए भने तेस्रो हुने टोलीबीच प्लेअफ फाइनल खेल खेलाइयो ।
त्यसमध्ये समूह ‘बी’को अस्ट्रेलियाले तेस्रो स्थानमा रहेर प्ले अफ फाइनलमा स्थान सुरक्षित गरिसकेको भने समूह ‘ए’ बाट युएई फाइनलमा पुगेको छ ।
अब, जुन ७ मा युएई र अस्ट्रेलियाले खेल्ने छन् ।
यो खेलको विजयी टोलीले विश्वकपमा स्थान बनाउनका लागि अन्तरमहादेशीय प्लेअफमा दक्षिण अमेरिकी राष्ट्र पेरुसँग १३ वा १४ जुनमा खेल्ने छ ।
ओसियाना
ओसियाना क्षेत्रबाट कुनै पनि टोलीले सीधै विश्वकपमा छनोट हुन पाउँदैनन् ।
तर अन्तरमहादेशीय प्लेअफबाट उनीहरूलाई अवसर हुनेछ ।
ओसियाना छनोटको फाइनलमा सोलोमोन आइल्यान्डमाथि ५-० गोलको फराकिलो जित निकाल्दै न्युजिल्यान्ड विजयी भएको छ ।
अब, उसले कन्काफ क्षेत्रको छनोटमा चौथो हुने टोली कोस्टारिकासँग अन्तरमहादेशीय प्ले अफ खेल खेल्ने छ ।
यो खेलको विजेता टोलीले कतार विश्वकपमा स्थान बनाउने छ ।
