विराटनगर । नेपाल भ्रमण सकेर कतारका अमिर (राजा) शेख तामिम बिल हमाद अल थानी स्वदेश फर्किएलगत्तै सामाजिक सञ्जालमा दुईवटा हात्तीलाई ट्रकमा चढाउँदै गरिएको भिडिओ भाइरल भइरहेको छ ।
भाइरल भिडिओमा दुवै हात्ती एउटा टुलमा टेक्दै ट्रकको ट्रलीमा उक्लिएको देखिन्छ । जसलाई नेपालले कतारलाई उपहार दिएका रुद्रकली र खगेन्द्रप्रसाद नामका दुई हात्ती भनिएको छ ।
उक्त दृश्य देखेर धेरै नेपाली भावुक भइरहेका छन् । तर, वास्तवमा ती हात्ती नेपालले कतारलाई उपहार घोषणा गरेका हात्ती होइनन् ।
चितवन राष्ट्रिय निकुञ्जमा रहेका ‘रुद्रकली’ र ‘खगेन्द्रप्रसाद’ अहिले आफ्नै ठाउँमा छन् ।
हात्ती लाने अझै प्रक्रिया सुरु भएकै छैन । कतार पठाउने भनिएका रुद्रकली र खगेन्द्र चितवनमै छन् ।
उपहारका हात्ती कतार पठाउने कानुनी तथा प्राविधिक प्रक्रिया पूरा भइनसकेको छैन ।
सोल्टी होटलमा भएको द्विपक्षीय वार्तामा हात्ती उपहारको सम्झौता एजेन्डासमेत बनेको छैन ।
हात्ती दुर्लभ वन्यजन्तु तथा वनस्पतिको अन्तर्राष्ट्रिय व्यापार महासन्धि (साइटिस) को अनुसूचीमा सूचीकृत छ ।
सो महासन्धिमा नेपालले पनि हस्ताक्षर गरेको छ । कतारलाई हात्ती पठाउन साइटिसले पनि सिफारिस गर्नुपर्छ ।
वन मन्त्रालयका अनुसार त्यहाँबाट पनि कुनै सिफारिस आइपुगेकै छैन ।
