संस्कृति, पर्यटन तथा नागरिक उड्डयन मन्त्री प्रेमबहादुर आलेले बलिउड स्टार सलमान खानलाई नेपालमा रहेकाे विश्वकै अग्लाे हिमाल सगरमाथा चढ्न अफर गरेका छन् ।
साङ्गेतिक कार्यक्रम लिएर जेठ १४ मा नेपाल भ्रमण गर्न लागेका खानसँग आज भर्चुअल कुरा गर्दै मन्त्री आलेले सगरमाथा आराेहणकाे लागि प्रस्ताव गरेका हुन् ।
मन्त्री आलेले सगरमाथाकाे आराेहणकाे प्रस्ताव गरेपछि खानले पनि ‘हुन्छ’ भन्दै सकारात्मक जवाफ दिएका थिए ।
त्यसबाहेक बुधबार सोल्टी होटलमा भएको भर्चुअल मिटिङमा मन्त्री आलेले बलिउड स्टार खानलाई सगरमाथासम्मकाे माउन्टेन फ्लाइटमा लैजाने र सगरमाथा नजिकै रहेकाे विश्वकै अग्लाे स्थानकाे हाेटलमा ‘ब्रेकफास्ट’ गराउने वाचा समेत गरेका छन् ।
बलिउड स्टार खानसँगकाे भर्चुअल कुराकानी प्रत्यक्ष रूपमा उनले स्वागत गर्न गरिएकाे भएपनि संवादका क्रममा मन्त्री आलेले पर्यटकका लागि नेपाल खुला भइसकेकाे जानकारी खानलाई गराएका थिए ।
संवादकाे बिचबीचमा नेपालकाे वर्णन गरेका मन्त्री आलेकाे कुरामा हाे भन्दै खानले नेपाल सुन्दर रहेकाे र नेपालमा आफूले केही प्राेजेक्ट समेत गरिसकेकाे समझिएका थिए ।
खान ओडिसी इन्टरटेन्टमेन्ट र हिटा समूहको निम्तोमा आगामी जेठ १४ गते दबङ्ग : द टुर रिलाेडेट कार्यक्रममा सहभागी हुन नेपाल आउने कार्यक्रम छ ।
उनीसँगै अभिनेत्री सोनाक्षी सिन्हा, ज्याकलिन फर्नान्डिज, कोरियोग्राफर प्रभु देवा, मुदस्सर खान, अभिनेता मनिष पल, आयुश शर्मा, सई मांजरेकर, पार्श गायक गुरु रन्धावालगायतका कलाकार नेपाल आउँदैछन् ।
