फिल्म ‘हिजो आजका कुरा’ असोज २८ मा रिलिज हुने भएको छ ।
कोरोना भाइरसको सङ्क्रमणको जोखिमका कारण तीन पटक हलहरू बन्द भएर खुलेपछि आउँदो असोज २८ गते फिल्मको प्रदर्शन मिति घोषणा गरिएको हो ।
यसअघि ‘हिजो आजका कुरा’को प्रदर्शन मिती २०७७ सालको बैशाख १२ गतेलाई तोकिएको थियो । तर, कोरोनाका कारण हलहरू बन्द भएपछि फिल्मको रिलिज स्थगन भयो ।
साकार पन्तको निर्देशनमा तयार भएको फिल्ममा सन्तोष पन्त, रमा थपलिया, रीमा विश्वकर्मा, केकी अधिकारी, ऋचा शर्मा, जेविका कार्की, रमेश अधिकारी, सविन शाक्य, नव-कलाकार द्वय विनायक कुइकेल, अनुष्का घिमिरे लगायतको अभिनय रहेको छ ।
१८ वर्षसम्म नेपाल टेलिभिजनमा प्रशारण भएको टेलिसिरियल ‘हिजो आजका कुरा’को नाम सापटी लिएर फिल्म निर्माण गरिएको हो ।
विदेशसँग सरोकार राखेका वा राख्न इच्छुक काठमाडौँका चार परिवारको पारिवारिक समस्या, सङ्घर्षलाई फिल्ममा उठान गरिएको छ ।
फिल्मको कथा सन्तोष सन्त र साकार पन्तले लेखेका हुन् भने पटकथा सन्दीप किस्नाको रहेको छ । फिल्मलाई रवि सायमीले छायाङ्कन गरेका हुन् ।
मोफसलमा एफडी र राजधानीमा बीके फिल्मस्ले फिल्मलाई वितरण गर्नेछ ।
