अघिल्लो लेगको फराकिलो जितको सहायतामा इङ्ग्लिस क्लब म्यानचेस्टर सिटी युइएफए च्याम्पियन्स लिग फुटबलको क्वार्टरफाइनलमा प्रवेश गरेको छ ।
बुधबार राति भएको अन्तिम १६ को दोस्रो लेगमा स्पोर्टिङ सिपीसँग गोलरहित बराबरी खेलेको सिटी समग्रमा ५-० को जितसहित अन्तिम आठमा पुगेको हो ।
पोर्चुगलमा भएको पहिलो लेगको खेलमा सिटीले ५-० को फराकिलो जित निकालेको थियो । जसको कारण सिटीले समग्रमा जित निकाल्दै अर्को चरणको यात्रा तय गरेको हो ।
इङ्ग्ल्यान्डस्थित इतिहाद स्टेडियममा भएको खेलको निर्धारित समय दुवै टिमले गोल गर्न सकेनन् ।
सिटीको घरेलु मैदानमा भएको दोस्रो लेगमा दुबै टोलीले पाएको अवसरलाई सदुपयोग गर्न सकेनन् ।
दुवै टोली फिनिसिङ चुक्दा खेल गोलरहित सकिएको हो ।
यससँगै लगातार पाँचौँ सिजन सिटीले अन्तिम आठमा स्थान बनायो भने सिपी प्रि–क्वार्टरफाइलबाटै बाहिरियो ।
