आइसिसी टी२० विश्वकप ग्लोबल क्वालिफायरको सेमिफाइनलमा युनाइटेड अरब इमिरेट्स (युएई)ले नेपाललाई एक सय ७६ रनको विजयी लक्ष्य दिएको छ ।
अल अमेरत क्रिकेट रङ्गशालमा भइरहेको नेपाल र युएईबीचको खेलमा नेपालले टस हार्दै पहिले फिल्डिङको लागि निम्तो पाएको थियो ।
युएईले सुरुवाती दश ओभरमा दुई विकेटको क्षतिमा ८४ रन बनाउँदै उत्कृष्ट सुरुवात गरेको थियो ।
युएईका लागि सर्वाधिक रन मोहम्मद वशिमले ७० र वृत्य अरिवन्दले ४६ रनको योगदान दिए ।
युएईलाई मध्य स्कारेमा रोक्न नेपालका लागि अविना बोहराले र जितेन्द्र मुखियाले समान तीन–तीन र कप्तान सन्दिप लामिछानेले एक विकेट लिए ।
नेपाललाई खेलको दोस्रो ओभरमा पहिलो सफलता मिलेको थियो ।
जितेन्द्र मुखियाले चिराग सुरीलाई बोल्ड आउट गर्दै पेभिलियन फर्काएका थिए ।
सुरीले पाँच बलको सामना गर्दै चार रन मात्रै जोड्न सफल भए ।
तर सुरी आउट भएसँगै तेस्रो नम्बरमा ब्याटिङ गर्न आएका वृत्य अरिवन्दले भने नेपाली बलरलाई दबाबमा राख्दै उत्कृष्ट पारी खेलेका थिए ।
पाँच चौका र तीन छक्कासहित २३ बलमा ४६ रनको उत्कृष्ट पारी खेलेका उनलाई नेपालका कप्तान सन्दिप लामिछानेले आफ्नो गुग्लीको धरापमा पार्दै क्लिन बोल्ड गर्दै क्रिज छाड्न बाध्य बनाए ।
लामिछानेले खेलको आठौँ ओभरको तेस्रो ओभरमा अरिवन्दले पेभिलियन पठाउँदै युएईलाई ठूलो स्कोर बनाउनबाट रोकेका थिए ।
तर त्यसपछि विकेटविहीन बनेको नेपाललाई युएईका मोहम्मद वशीमको आक्रमक पारीले दुःख दिएको थियो ।
कमलसिंह ऐरीको १३औं ओभरमा वशीमले अफ्नो अर्धशतक पूरा गरेका थिए ।
नेपालले तेस्रो सफलता १७औं ओभरमा पाएको थियो ।
अविनाश बोहराले मोहम्मद उसमानलाई ज्ञानेन्द्र मल्लमार्फत क्याच गराएका थिए । पेभिलियन फर्कनुअघि उसमानले २४ बलमा १७ रनको योगदान दिएका थिए ।
सोही ओभरमा बोहराले व्यक्तिगत दोस्रो विकेट लिँदै मोहम्मद वशीमलाई पेभिलियन फर्काए । ४८ बलमा ७० रन बनाएका वशीमलाई बोहराले १७औं बलको पाँचौँ बलमा आरिफ शेखमार्फत क्याच गराए ।
जितेन्द्र मुखियाले खेलको १८औं ओभरको नेपाललाई पाँचौँ सफलता दिलाए ।
१८औं ओभरको पहिलो बलमा मुखियाले वशिल हमिदलाई विवेक यादवमार्फत क्याच गराएर नेपाललाई खेलमा फर्काउने प्रयास गराए ।
१८औं ओभरको अन्तिम बलमा मुखियाले नेपाललाई छैटौँ सफलता दिलाए । मुखियाले जवार फरिदलाई ज्ञानेन्द्र मल्लमार्फत उत्कृष्ट क्याच गराए ।
१९औं ओभरको पाँचौँ बलमा काशिफ दाउदलाई क्रिज छाड्न बाध्य बनाउँदै नेपालले सातौँ सफलता हात पा¥यो ।
बोहराले दाउदलाई कप्तान लामिछानेमार्फत क्याच गराए । पेभिलियन फर्कनुअघि दाउदले चार बलमा चार रन बनाएका थिए ।
जारी क्वालिफायरमा कुनै पनि राष्ट्रिय टोलीले नेपालविरुद्ध बनाएको हालसम्मकै यो उच्च रन हो ।
क्वालिफायरको समूह चरणको पहिलो खेलमा नेपालले ओमानविरुद्ध खेलेको थियो । पहिलो खेलमा ओमानलाई ७८ रनमै समेटेर ३९ रनको जित निकाल्दै विजयी सुरुवात गरेको नेपालले दोस्रो खेलमा फिलिपिन्सलाई एक सय ३६ रनको विशाल अन्तरले हराएको थियो ।
फिलिपिन्सलाई ८२ रनमै समेटेको नेपाल समूह चरणको अन्तिम खेलमा क्यानडालाई आठ विकेटलाई हराउँदै सेमिफाइनल प्रवेश गरेको थियो ।
समूहको शीर्ष स्थानमा रहँदै समूह चरणका खेल सकेको नेपालले अन्तिम खेलमा क्यानडालाई ८० रनमै समेटेको थियो ।
आजको खेलमा नेपाल विजयी भए अस्ट्रेलियामा यहीँ वर्ष आयोजना हुने टी२० विश्वकपमा नेपालले आफ्नो स्थान पक्का गर्नेछ ।
नेपालले पछिल्लो पटक २०१४मा बङ्गलादेशमा सम्पन्न टी२० विश्वकपमा सहभागीता जनाएको थियो ।
२०१४ को विश्वकप नै नेपालको पहिलो र पछिल्लो विश्वकप सहभागीता हो ।
