नेपाली राष्ट्रिय पुरुष फुटबल टाेलीका मिडफिल्डर विशाल राई वैवाहिक जीवन बाँधिएका छन् ।
ए डिभिजन क्लब मछिन्द्र फुटबल क्लबका खेलाडी समेत रहेका राईले आज (शुक्रबार) इलामकी रविना गुरुङसँग लगनगाँठाे कसेका हुन् ।
दुई वर्षदेखिको प्रेम सम्बन्धलाई राई–गुरुङ जाेडीले विवाहमा परिणत गरेका हुन् ।
झापा अर्जुनधारा–११ निवासी विशालले इलाम सन्दकपुर–४ मावोकी रविनासँग विवाह गरेका हुन् ।
दशरथ रंगशालामा मछिन्द्रले लगातार दोस्रो पटक लिगको उपाधि रक्षा गरेका दिन विशाल भने रविनलाई लिन झापाबाट इलाम पुगेका थिए ।
उनी लगातार चौथो पटक लिग च्याम्पियन बन्ने नेपाली खेलाडी समेत हुन् ।
यस सिजन ‘ए’ डिभिजन लिग जितेसँगै मछिन्द्रले लगातार दुई पटक उपाधि आफ्नाे नाममा लेखाएकाे छ ।
मछिन्द्रकाे याे सफलतामा विशालकाे भूमिका महत्वपूर्ण छ । मछिन्द्रसँग लगातार दुई पटक लिग जित्नुअघि उनले त्यहि सफलता मनाङ मस्र्याङ्दी क्लबबाट पनि प्राप्त गरेका छन् ।
विवाहमा सरिक हुन मछिन्द्रका कप्तान सुजलसहित केही खेलाडी झापा पुगेका थिए ।
वैवाहिक बन्धनमा बाँधिएर नयाँ जीवन सुरू गरेका विशाल र उनकी जीवनसँगिनी गुरूङलाई साथीभाइ, आफन्त, समर्थक, फुटबलप्रेमी, खेलाडी, क्लबका अफिसियल र अखिल नेपाल फुटबल सङ्घ (एन्फा) का पदाधिकारीहरूले बधाई तथा शुभकामना व्यक्त गरिररहेका छन् ।
