कोरोना भाइरसको ओमिक्रोन भेरिएन्टका लागि खोप परीक्षण सुरु गरिएको छ ।
फाइजर र बायोएनटेक कम्पनीले ५५ वर्ष उमेर समूहसम्मका मानिसमा ओमिक्रोन लक्षित खोपका लागि क्लिनिकल परीक्षण सुरु गरेको हो ।
जर्मनी कम्पनी बायोएनटेकका प्रमुख कार्यकारी अधिकृत उगुर साहिनले कोभिडसँग लड्न बनाइएको यसअघिका खोपले ओमिक्रोनविरुद्ध पूर्ण रुपमा काम नगरेको सङ्केत देखिएको बताएका छन् ।
१४ सयभन्दा बढीलाई समावेश गरिएको अध्ययमा ६ सय १५ जनालाई फाइजर-बायोन्टेकले हाल उपलब्ध गराइरहेको खोपको दुई मात्रा दिइने छ ।
त्यसपछि उनिहरूलाई ओमिक्रोनलक्षित खोपको एक मात्रा दिइनेछ । अर्को समुहका ६ सय जनालाई हाल उपलब्ध खोपको तीन मात्रा लगाइसकेपछि ओमिक्रोनलक्षित खोप दिइनेछ ।
र, खोप नलगाएका दुई सयलाई भने ओमिक्रोनलक्षित खोपको तीन मात्रा दिइनेछ ।
फाइजरका कार्यकारी अधिकृत अल्बर्ट बोरलाले परीक्षणको परारम्भिक नतिजा आउँदो मार्चसम्ममा निकाल्ने प्रयासमा रहेको बताएका छन् ।
–बिबिसीबाट
