काठमाडौं — प्रमुख प्रतिपक्षी दल नेपाली कांग्रेस ले राष्ट्रपति रामचन्द्र पौडेलले सरकारको नीति तथा कार्यक्रम प्रस्तुत गरिरहँदा प्रधानमन्त्री बालेन शाह संसद् बैठकबाट बाहिरिएको घटनाबारे स्पष्ट जवाफ माग गरेको छ।
मंगलबार प्रतिनिधिसभा बैठकमा बोल्दै कांग्रेस सांसद वासना थापाले उक्त घटनालाई लोकतान्त्रिक संसदीय अभ्यासको इतिहासमै विरलै देखिने दृश्य भएको टिप्पणी गरिन्।
“राष्ट्रपतिज्यूबाट सरकारकै नीति तथा कार्यक्रम प्रस्तुत भइरहँदा प्रधानमन्त्रीज्यू संसद्बाट बाहिरिनु केवल सामान्य घटना होइन,” उनले भनिन्।
उनले संवैधानिक संस्कार, संसदीय परम्परा, राज्यको उत्तरदायित्व र सरकारको गम्भीरतामाथि प्रश्न उठेको बताइन्।
“यस विषयमा स्पष्ट जवाफ दिइयोस् । यस्ता घटनाको पुनरावृत्ति नहोस् । लोकतन्त्रमा पदभन्दा ठूलो कुरा मर्यादा र मर्यादाभन्दा ठूलो कुरा जनविश्वास हो भन्ने कुरामा ध्यान जाओस्,” सांसद थापाले भनिन्।
उनले प्रतिपक्षी दलको तर्फबाट प्रधानमन्त्रीसँग औपचारिक जवाफसमेत माग गरेकी छन्।
