विराटनगर । हालै सम्पन्न प्रतिनिधिसभा सदस्यको निर्वाचनमा मोरङका विभिन्न क्षेत्रमा प्रतिस्पर्धा गरेका केही उम्मेदवारहरू अत्यन्त न्यून मतमा सीमित भएका छन् । स्वतन्त्र तथा साना दलका कतिपय उम्मेदवारले ५ देखि ५० भन्दा कम मतमात्रै प्राप्त गरेका छन् ।
मोरङका जिल्लाभर कुल ७ लाख ८३ हजार ५० मतदातामध्ये २ लाख ३१ हजार ३९७ मत खसेको थियो । मोरङका ६ वटा निर्वाचन क्षेत्रमा चुनावी मैदानमा उत्रिएका कुल १ सय १० उम्मेदवारमध्ये ३२ जनाले ५० मत पनि कटाउन सकेनन् ।
यस पटकको निर्वाचनमा मोरङका ६ वटै क्षेत्रमा राष्ट्रिय स्वतन्त्र पार्टी (रास्वपा) का उम्मेदवारहरू क्लिन स्वीप गर्दै विजयी भएका छन् । ५० मत पनि ल्याउन नसक्ने उम्मेदवारहरूको संख्या सबैभन्दा बढी क्षेत्र नं. ५ मा छ भने सबैभन्दा कम क्षेत्र नं. ६ मा देखिएको छ ।
प्रतिनिधिसभा निर्वाचनमा मोरङ क्षेत्र नम्बर १ बाट स्वतन्त्र उठेका ईश्वर र वाग्लेले ४० मत प्राप्त गरेका छन् । त्यस्तै, अर्का स्वतन्त्र उम्मेदवार यामप्रसाद दाहालले ३९ मत मात्र पाएका छन् । स्वतन्त्र उठेका मिलन भण्डारीले ३१ मत पाएका छन् ।
नेपाल जनमुक्ति पार्टीबाट उठेका फिव राज लिम्बुले ३० मत प्राप्त गरेका छन् । स्वतन्त्र उम्मेदवार पशुपति घिमिरे १७ मत प्राप्त गरे भने मितेरी पार्टी नेपालका डिल्ली राम लिम्बुले १२ मत मात्र पाए । यस क्षेत्रबाट रास्वपाका यज्ञाणि न्यौपाने निर्वाचित हुँदै संघीय सदन पुगे भने श्रम-संस्कृति पार्टीकी शान्ति पाख्रिङ लामा दोस्रो भइन् । यो क्षेत्रमा ७७ हजार ५८५ मत खसेको थियो ।
त्यसैगरी, मोरङ २ मा १७ उम्मेदवारमध्ये तीनजनाले ५० मत कटाउन सकेनन् । यस क्षेत्रबाट स्वतन्त्र उठेका राजन निरौलाले ४८ मतमात्र प्राप्त गरे । सोही क्षेत्रका स्वतन्त्र उम्मेदवार बुधु ऋषिदेवले ३५ मत पाए भने अर्का स्वतन्त्र उम्मेदवार नरेशकुमार साहले १८ मत प्राप्त गरे । कुल ८१ हजार ३४५ मत खसेको यस क्षेत्रबाट ४० हजार ९२४ मत ल्याएर रास्वपाकै कृष्णकुमार कार्की निर्वाचित हुँदा एमालेका दिलीपकुमार बगडिया दोस्रो भए ।
मोरङ क्षेत्र नम्बर ३ बाट पाँच जनाले ५० भन्दा कम भोट पाए । जय मातृभूमि पार्टीबाट चुनावमा उठेका नवराज मास्केले ४९ मत मात्र पाएका भने स्वतन्त्र उम्मेदवार गणेश मिश्रले ४४ मत प्राप्त गरे । पूर्वसांसद योगेन्द्र मण्डल नेतृत्वको राष्ट्रिय उर्जाशील पार्टी नेपालका नेता भुवनकुमार वाग्लेले ३१ मत पाउँदा स्वतन्त्र उम्मेदवार तेजप्रसाद भण्डारीले ३० मत पाए । यसैगरी, जनता समाजवादी पार्टी, नेपालका नेता मजेबुल रहमानले १८ मतमात्र पाए । यस क्षेत्रमा रास्वपाका गणेश कार्की ३६ हजार ९२४ मतका साथ विजयी हुँदा कांग्रेसका सुनील शर्मा द्वितीय भए । यो क्षेत्रमा कुल ९६ हजार ६७७ मत खसेको थियो ।
मोरङ क्षेत्र नम्बर ४ बाट स्वतन्त्र उठेका भक्तमणी दाहालले ४० मत प्राप्त गरे । नागरिक उन्मुक्ति पार्टीबाट उठेका हरिनारायण चौधरीले ३८ प्राप्त गरे भने नेपाल मजदुर किसान पार्टीबाट जयराम थारुले २९ मत पाए । स्वतन्त्र उम्मेदवार ज्ञानेन्द्र खत्रीले २५ मत पाउँदा अर्का स्वतन्त्र उम्मेदवार विनोदकुमार कार्कीले १७ मत पाए । यसै क्षेत्रमा संघीय लोकतान्त्रिक राष्ट्रिय मञ्चका नेता हरनु मुसहरले ११ मत पाए ।
मोरङ ४ मा १९ जना उम्मेदवार चुनावी मैदानमा थिए, जसमध्ये ६ जनाले ५० मत कटाएनन् । यस क्षेत्रबाट कांग्रेस महामन्त्रीसमेत रहेका गुरुराज घिमिरेलाई पराजित गर्दै रास्वपाका सन्तोष राजवंशी निर्वाचित भए । कुल १ लाख १९ हजार २५५ मतदातामध्ये ३९ हजार ३३० मत खसेको थियो ।
मोरङ क्षेत्र नम्बर ५ का स्वतन्त्र उम्मेदवार राजकुमार राजवंशीले ४७ मत पाए भने राष्ट्रिय मुक्ति पार्टी नेपालका नेता नरेशकुमार लाभले २८ मत पाए । स्वतन्त्र उम्मेदवार सुजितकुमार साहले २८ मत पाए । नेपाल मजदुर किसान पार्टीकी उम्मेदवार गंगाकुमारी राजवंशीले २२ मत पाइन् भने मंगोल नेशनल अर्गनाइजेसनबाट सकुन्तला श्रेष्ठले १७ प्रप्त गरिन् ।
स्वतन्त्र उम्मेदवार ममता यादवले १३ मत पाउँदा स्वतन्त्र उम्मेदवार विकाश श्रेष्ठले ११ मत पाए । स्वतन्त्र उम्मेदवार सूर्यनारायण ठाकुरले ५ मतमात्र पाए भने अर्का स्वतन्त्र उम्मेदवार जय नारायण शर्माले ३ मत मात्र पाए । सबैभन्दा बढी २२ जना उम्मेदवार रहेको यस क्षेत्रमा १० जनाले ५० मत कटाउन सकेनन् । यस क्षेत्रमा रास्वपाकी आशा झा ३० हजार ४३४ मतसहित विजयी हुँदा नेपाली कांग्रेसका फूलकुमार लालवानी निकटतम् प्रतिद्वन्द्वी बने । कुल १ लाख १० हजार १७७ मतदाता रहेको यस क्षेत्रमा ७८ हजार ५२९ मत खसेको थियो ।
मोरङ क्षेत्र नम्बर ६ बाट १७ उम्मेदवारले चुनावी प्रतिस्पर्धा रोजेका थिए । यस क्षेत्रमा २ जनाले मात्र ५० मत कटाउन सकेनन् । जय मातृभूमि पार्टीबाट उठेका नवराज मास्के ४९ मत पाउँदा स्वतन्त्र उम्मेदवार गणेश मिश्रले ४४ मत पाए । यस क्षेत्रबाट रास्वपाकी रुबिना आचार्य ५५ हजार ५१३ मतका साथ भारी मतले निर्वाचित भइन् भने कांग्रेसका प्रभावशाली नेता मानिने डा. शेखर कोइराला पराजित बने । मोरङ–६ मा ८९ हजार ८४७ मत खसेको थियो । खसेकोमध्ये ८५ हजार २३३ सदर र ४ हजार ६१६ मत बदर भएको थियो ।
