विराटनगर । सुनसरीको देवानगञ्ज गाउँपालिका–३ स्थित कप्तानगञ्जमा हिन्दु र मुस्लिम समुदायबीच भएको झडपमा एक जनाको मृत्यु भएपछि देवानगञ्ज गाउँपालिकाले दुई दिन शोक विदा घोषणा गरेको छ।
गाउँपालिकाले जारी गरेको सूचनाअनुसार गाउँपालिकाअन्तर्गतका सबै वडा कार्यालय, शैक्षिक संस्था तथा अन्य सरकारी कार्यालयमा शोक विदा दिइएको छ। स्वास्थ्य संस्था तथा अत्यावश्यक सेवा भने नियमित रूपमा सञ्चालन हुने जनाइएको छ।
झडपका क्रममा सुरक्षाकर्मीको गोली लागेर कप्तानगञ्ज निवासी ओमप्रकाश मेहताको मृत्यु भएको हो। घटनापछि क्षेत्रको सुरक्षा व्यवस्था कडा पारिएको छ।
प्रारम्भिक जानकारीअनुसार हिन्दु समुदायले मन्दिरमा ठूलो आवाजमा डिजे बजाएको तथा त्यसअघि सो क्षेत्रमा रहेको बिजुलीको पोलमा राखिएको मुस्लिम समुदायको झण्डा हटाएर हिन्दु समुदायको झण्डा राखिएको विषयलाई लिएर विवाद चर्किएको सुरक्षा अधिकारीहरूले बताएका छन्।
विवादले उग्र रूप लिएपछि दुवै समुदायबीच झडप भएको जनाइएको छ।स्थिति नियन्त्रणमा लिन नेपाल प्रहरीले ३ राउन्ड र सशस्त्र प्रहरीले ७ राउन्ड हवाई फायर गरेको सुरक्षा निकायले जनाएको छ।
यद्यपि सुनसरीका प्रमुख जिल्ला अधिकारी वासुदेव अधिकारीले घटनास्थलमा सशस्त्र प्रहरीले २० राउन्ड गोली चलाएको बताएका छन् ।
घटनाको गम्भीरतापछि सिंहदरबारमा गृहमन्त्री सुधन गुरुङले गृहसचिव राजकुमार श्रेष्ठ, नेपाल प्रहरीका महानिरीक्षक दानबहादुर कार्की तथा सशस्त्र प्रहरी बलका प्रमुख नारायणदत्त पौडेलसँग घटनाबारे छलफल गरेका छन्।
यस घटनापछि देवानगञ्ज क्षेत्रमा सुरक्षा सतर्कता बढाइएको छ भने स्थानीय प्रशासनले सबै पक्षलाई संयम अपनाउन र सामाजिक सद्भाव कायम राख्न आग्रह गरेको छ।
