नेपाल सरकारको वार्ता टोली र प्रा. डा. गोविन्द केसीबीच सोमबार ७ बुँदे सहमति भएको छ। सहमतिसँगै डा. केसीले आजदेखि आफ्नो सत्याग्रह (अनशन) अन्त्य गर्ने भएका छन्।
सहमतिअनुसार शहीद दशरथ चन्द स्वास्थ्य विज्ञान विश्वविद्यालय, गेटा, कैलालीलाई पूर्ण क्षमतामा सञ्चालन गर्दै ३०० शैय्याको शिक्षण अस्पताल सञ्चालनका लागि आवश्यक जनशक्ति, उपकरण र शैक्षिक कार्यक्रमको व्यवस्था गरिनेछ। विश्वविद्यालयसम्बन्धी ऐन संशोधन प्रक्रिया अघि बढाइने, चिकित्सा शिक्षा आयोगले मापदण्डअनुसार सिट निर्धारण गर्ने तथा सीमावर्ती क्षेत्रका नागरिकका लागि स्वास्थ्य, शिक्षा, यातायात र रोजगारीमा आवश्यक पूर्वाधार विस्तार गर्न संघ र प्रदेश सरकारले समन्वय गर्ने सहमति भएको छ।
यस्तै, २०८२ साउन २३ र २४ गते भएका प्रदर्शनका क्रममा भएका हत्या, आगजनी, लुटपाट र तोडफोडमा संलग्नमाथि कानुनबमोजिम कारबाही प्रक्रिया अघि बढाउने तथा सहमति कार्यान्वयनको अनुगमनका लागि सम्बन्धित मन्त्रालय र निकायका प्रतिनिधि रहेको कार्यदल गठन गरी तीन महिनाभित्र प्रतिवेदन पेश गर्ने सहमति पनि भएको छ।
