सुनसरी । सुनसरीको हरिनगर गाउँपालिका–स्थित कप्तानगञ्ज बजार शनिबार दुई समूहबीच भएको हिंसात्मक झडपपछि तनावग्रस्त बनेको छ। झडप नियन्त्रणबाहिर गएपछि प्रहरीले अश्रुग्यास, हवाई फायर र अन्ततः गोली चलाउँदा एक जनाको मृत्यु भएको छ भने ८ जना सर्वसाधारण र ८ जना प्रहरी घाइते भएका छन्।
प्रहरीका अनुसार दुई समूहबीचको विवाद उग्र बन्दै गएपछि सुरक्षाकर्मीले सुरुमा अश्रुग्यास प्रहार गरी भीड नियन्त्रणमा लिने प्रयास गरेका थिए। त्यसबाट पनि अवस्था सामान्य हुन नसकेपछि हवाई फायर गरिएको थियो। हवाई फायरपछि पनि भीड नियन्त्रणमा नआएपछि बाध्य भएर गोली चलाइएको प्रहरीले जनाएको छ।
गोली लागेर घाइते भएका एक जनाको उपचारका क्रममा मृत्यु भएको प्रहरीले पुष्टि गरेको छ। घटनामा घाइते भएका अधिकांश सर्वसाधारणलाई गोली लागेको बताइएको छ। घाइतेमध्ये २२ वर्षीय मिथलेश यादव, १८ वर्षीय अमलेश मेहता, २५ वर्षीय मिथलेश मेहता र २० वर्षीय अमितकुमार यादवको विराटनगरस्थित कोशी अस्पतालमा उपचार भइरहेको छ।
यस्तै २१ वर्षीय रविन्द्र मेहता, १८ वर्षीय अमितकुमार यादव, २५ वर्षीय सुनिलकुमार मेहता र २६ वर्षीय सुनिलकुमार मेहताको विराट नर्सिङ होममा उपचार भइरहेको जिल्ला प्रहरी कार्यालय सुनसरीले जनाएको छ।
झडपमा प्रहरीतर्फ प्रहरी निरीक्षक राकेश राईसहित ८ जना सुरक्षाकर्मी घाइते भएका छन्। प्रहरी निरीक्षक राईको टाउकोमा चोट लागेको छ भने प्रहरी नायब निरीक्षक गणेशनारायण श्रेष्ठ, प्रहरी वरिष्ठ हवल्दार अमरलाल यादव, प्रहरी रामबहादुर राई, प्रहरी विजय यादव, प्रहरी सहायक निरीक्षक नवराज पोखरेल, प्रहरी बुद्धदेव साह र प्रहरी जवान निवेश यादव पनि घाइते भएका छन्।
झडपका क्रममा कप्तानगञ्ज बजारका घर, मेडिकल, सवारीसाधन तथा अन्य संरचनामा व्यापक तोडफोड र आगजनी भएको प्रहरीले जनाएको छ। घटनापछि क्षेत्रमा ठूलो संख्यामा नेपाल प्रहरी र सशस्त्र प्रहरी परिचालन गरिएको छ भने स्थिति नियन्त्रणमा लिने प्रयास जारी रहेको छ।
घटनाको कारण, मृत्यु भएका व्यक्तिको औपचारिक परिचय तथा भौतिक क्षतिको विस्तृत विवरण आउन बाँकी रहेको प्रहरीले जनाएको छ। घटनाबारे थप अनुसन्धान भइरहेको छ।
