विराटनगर । सुनसरीको देवानगञ्ज गाउँपालिका–३ कप्तानगञ्जमा हिन्दु र मुस्लिम समुदायबीच भएको झडपको घटनाबारे छानबिन गर्न गृह मन्त्रालयले समिति गठन गरेको छ।
गृहमन्त्री सुधन गुरुङको अध्यक्षतामा बसेको बैठकले मन्त्रालयका सहसचिवको नेतृत्वमा समिति गठन गर्ने निर्णय गरेको हो।
झडपपछि जिल्ला प्रशासन कार्यालय सुनसरीमा सर्वपक्षीय छलफल भइरहेको छ। कर्फ्यु उल्लंघन गर्दै प्रदर्शनकारीले आगजनी र तोडफोड गरेपछि कप्तानगञ्ज क्षेत्रमा नेपाली सेना परिचालन समेत गरिएको छ।
आइतबार राति भएको झडप नियन्त्रण गर्ने क्रममा सुरक्षाकर्मीको गोली लागेर ओमप्रकाश मेहताको मृत्यु भएको थियो।
डिजे बजाउने र झन्डा राख्ने विषयमा सुरु भएको विवादपछि झडप भएको बताइएको छ। अहिले पनि त्यस क्षेत्रको अवस्था तनावपूर्ण रहेको छ।
