विराटनगर । मोरङ निर्वाचन क्षेत्र नम्बर ५ का नेकपा एमाले उम्मेदवार मनोजकुमार अग्रवालले आफ्नो चुनावी अभियानलाई तीव्र बनाएका छन् ।
आसन्न प्रतिनिधिसभा सदस्य निर्वाचन नजिकिँदै जाँदा अग्रवाल आक्रमक ढंगले चुनावी प्रचारमा होमिएका हुन् । चुनावी प्रचारप्रसार सुरु भएसँगै अग्रवाल आफ्नो पार्टीका विभिन्न जनवर्गीय संगठन, भातृसंगठनका पदाधिकारी तथा कार्यकर्ताहितको ठुलो उपस्थितिसहित चुनावी अभियानमा सक्रिय बनेका हुन् ।
अग्रवालले हाल आफ्नो निर्वाचन क्षेत्रका विभिन्न स्थान पुगेर घरदैलो गर्दै मतदातासँग साझात्कार गरिरहेका छन् । मतदातासँग अग्रवालले क्षेत्र विकासका एजेन्डासहितका आफ्ना विभिन्न योजनाहरू फेहरिस्त लगाउने काम गरिरहेका छन् ।
घरदैलोका क्रममा मतदाताको गुनासाे सुन्ने, सुझाव लिने काम गरिरहेका अग्रवालले संघीय संसदमा पुगे कानुन निर्माणसँगै स्थानीय विकासलाई प्राथमिकता दिएर अघि बढ्ने प्रतिबद्धता जनाएका छन् । पहिले जितेर जानेहरूबाट जनताले अपेक्षाकृत ढंगको विकास नपाएको गुनासो आफूसँग गर्नेगरेको अग्रवालको भनाइ छ ।
अग्रवालले घरदैलो कार्यक्रमलाई आक्रामक ढंगले अगाडि बढाएसँगै मतदाता तथा सर्वसाधारणमा जागरुकता छाएको देखिएको छ । त्यतिमात्र नभएर एमालेले पछिल्लो एक दशकपछि मोरङ ४ मा आफ्नै उम्मेदवारलाई चुनावमा उठाएपछि एमालेका नेता, कार्यकर्तामा उत्साह छाएको छ ।
त्यसबाहेक स्वच्छ छवि र इमान्दार व्यक्तित्वको पहिचान बनाएका मनोजको पक्षमा जनलहरसमेत बढ्दै गएको छ ।
