विराटनगर । सुनसरीको देवानगञ्जमा भएको हिंसात्मक घटनापछि उत्पन्न तनावलाई मत्थर पार्दै धार्मिक सहिष्णुता, सामाजिक सद्भाव र शान्तिको सन्देश प्रवाह गर्न आज विराटनगरमा बृहत् सद्भाव र्याली आयोजना गरिने भएको छ।
जिल्ला प्रशासन कार्यालय मोरङमा बसेको सर्वपक्षीय बैठकले दिउँसो ३ बजे महेन्द्र चोकबाट सद्भाव र्याली निकाल्ने निर्णय गरेको हो। र्याली महेन्द्र चोकबाट सुरु भई ट्राफिक चोक, पञ्चमुखी हनुमान मन्दिर हुँदै जिल्ला प्रशासन कार्यालय अगाडिको डाँफे चोकमा पुगेर समापन हुनेछ।
र्यालीमा राजनीतिक दल, नागरिक समाज, विभिन्न धार्मिक समुदायका प्रतिनिधि, सामाजिक अगुवा तथा सर्वसाधारणको सहभागिता रहने अपेक्षा गरिएको छ। प्रशासनले सबै समुदायलाई शान्ति, सद्भाव र आपसी भाइचाराको सन्देश फैलाउन सक्रिय सहभागिताका लागि आग्रह गरेको छ।
यसैबीच, देवानगञ्ज घटनामा प्रहरीको गोली लागेर गम्भीर घाइते भएका रविन्द्र मेहता र अमितकुमार यादवलाई थप उपचारका लागि आज नेपाली सेनाको हेलिकप्टरमार्फत काठमाडौं लैजाने तयारी गरिएको प्रशासनले जनाएको छ। उपचारका लागि सम्बन्धित अस्पतालसँग आवश्यक समन्वय भइरहेको पनि प्रशासनले जानकारी दिएको छ।
जिल्ला प्रशासन कार्यालयले सामाजिक सञ्जालमा धार्मिक वा साम्प्रदायिक द्वेष फैलाउने, उत्तेजना बढाउने तथा सामाजिक सद्भाव खल्बल्याउने सामग्री प्रकाशन वा प्रसारण नगर्न सबैलाई आग्रह गरेको छ। यस्ता गतिविधिमा संलग्न व्यक्तिमाथि कानुनबमोजिम कारबाही गरिने चेतावनी पनि प्रशासनले दिएको छ।
सर्वपक्षीय बैठकमा सहभागी राजनीतिक दल तथा सरोकारवालाहरूले जिल्लामा शान्ति, सुरक्षा र सामाजिक सद्भाव कायम राख्न साझा प्रयास गर्ने तथा कानुनविपरीतका गतिविधि नियन्त्रणमा प्रशासनलाई आवश्यक सहयोग गर्ने प्रतिबद्धता व्यक्त गरेका छन्।
