विराटनगर । सुनसरीका प्रमुख जिल्ला अधिकारीको समन्वयमा देवानगञ्ज घटनापछि उत्पन्न अवस्थाबारे छलफल गर्न बिहीबार दिउँसो २ बजे जिल्ला प्रशासन कार्यालय, इनरुवामा संयुक्त बैठक बोलाइएको छ।
सुनसरीका प्रतिनिधिसभा सदस्य लालविक्रम थापाका अनुसार जिल्लामा शान्ति–सुरक्षा र सामाजिक सद्भाव कायम गर्दै पीडित पक्षलाई न्याय सुनिश्चित गर्ने विषयमा छलफल, समन्वय तथा साझा निष्कर्षमा पुग्ने उद्देश्यले बैठक बोलाइएको हो ।
बैठकमा सुनसरीका सङ्घीय तथा प्रदेश सांसद, प्रमुख राजनीतिक दलका जिल्ला प्रमुख तथा देवानगञ्ज, हरिनगरा, कोशी, र इनरुवा लगायत स्थानीय तहका प्रमुख तथा उपप्रमुख तथा प्रतिनिधिहरू सहभागी हुनेछन्।
गत साउन १० गते देवानगञ्जमा भएको झडपका क्रममा प्रहरीको गोली लागेर एक जनाको मृत्यु भएपछि जिल्लाको अवस्था तनावग्रस्त बनेको छ।
