विराटनगर । विराटनगर–७ स्थित हाटखोलामा रहेको ‘हाम्रो प्रयास’ संस्थाले आफ्नो छैटौँ वार्षिक उत्सवको अवसरमा सामूहिक रक्तदान कार्यक्रम सम्पन्न गरेको छ।
कार्यक्रम संयोजक सावित्रा ढकाल (दाहाल)को संयोजनमा सम्पन्न उक्त रक्तदान कार्यक्रममा करिब ३० जनाको सहभागिता रहेको थियो। कार्यक्रम सफलतापूर्वक सम्पन्न भएको आयोजकले जानकारी दिएका छन्।
कार्यक्रमलाई सम्बोधन गर्दै संयोजक दाहालले रक्तदानमा सहभागी सबै रक्तदाता दाजुभाइ तथा दिदीबहिनीहरूलाई हृदयदेखि धन्यवाद व्यक्त गर्दै भनिन्, “हाम्रो निमन्त्रणालाई स्वीकार गरी यहाँसम्म आएर रक्तदान गर्नु हुने सम्पूर्ण रक्तदाता साथीहरूलाई हार्दिक धन्यवाद दिन चाहन्छु।”
त्यसैगरी, उनले संस्थामा आबद्ध व्यक्तित्वहरू तथा कार्यक्रममा उपस्थित सबैप्रति आभार व्यक्त गरिन्। कार्यक्रममा उपस्थित हुन नसक्ने सबै शुभेच्छुकहरूप्रति समय मिलेसम्म यस्ता कार्यक्रममा सहभागी हुन अपील गरिन् ।
कार्यक्रमको समापन गर्दै ‘हाम्रो प्रयास’ की उपाध्यक्ष गिता पोखरेलले रक्तदाताहरू, स्वयंसेवकहरू तथा कार्यक्रम सफल बनाउन प्रत्यक्ष–अप्रत्यक्ष रूपमा सहयोग गर्ने सबैप्रति धन्यवाद व्यक्त गरिन्।
कार्यक्रममा नेपाल पत्रकार महासङ्घ कोशी प्रदेशका उपाध्यक्ष तथा ‘हाम्रो प्रयास’ का सल्लाहकार कुमोद अधिकारीको विशेष उपस्थिति रहेको थियो। साथै पत्रकार भोजराज घिमिरेको पनि उपस्थिति रहेको थियो।
कार्यक्रममा ‘रक्तदान जीवनदान हो’ र ‘स्वार्थका लागि होइन, सेवाका लागि’ भन्ने सन्देशलाई मुख्य नाराका रूपमा अघि सारिएको थियो।
