विराटनगर । कोशी प्रदेशको प्रतिष्ठित शैक्षिक संस्था शिक्षादीप कलेजले विद्यार्थीहरूको प्राविधिक क्षमता र व्यावसायिक सोच विकास गर्ने उद्देश्यले आयोजना गरेको नवप्रवर्तन प्रदर्शनीले उल्लेखनीय सफलता हासिल गरेको छ।
कलेजले काठमाडौंका तीन प्रतिष्ठित शैक्षिक संस्था—कोर्ड हिमालयन, टेक स्पायर कलेज र पीसीपीएस कलेजसँगको साझेदारीमा १० दिने आइटी तथा व्यवस्थापन प्रशिक्षण सम्पन्न गरेको थियो। यस प्रशिक्षणमा ७५४ विद्यार्थीको सहभागिता रहेको थियो, जसमध्ये ६२० जना विज्ञान संकाय र १३४ जना व्यवस्थापन संकायका थिए।
प्रदर्शनीमा विद्यार्थीहरूले निर्माण गरेका अत्याधुनिक रोबोट र नवीन व्यावसायिक योजनाहरू प्रस्तुत गरेका थिए। विशेष आकर्षणको रूपमा बोल्न सक्ने र मानिसको अनुहारबाट खुशी वा दुःखको भाव पहिचान गर्न सक्षम रोबोट प्रदर्शनीमा राखिएको थियो।
विज्ञान संकायका विद्यार्थीले रोबोटिक्स परियोजनामा केन्द्रित रहँदा व्यवस्थापन संकायका विद्यार्थीले नवप्रवर्तनात्मक व्यावसायिक अवधारणा प्रस्तुत गरेका थिए। आइटी ह्याकाथुनमा ६० र व्यवस्थापनको बिजनेस सेसनमा ३५ विद्यार्थीले सक्रिय सहभागिता जनाएका थिए।
प्रशिक्षणमा काठमाडौंबाट आइटी विज्ञ कृपा श्रेष्ठ, कृषकुमार श्रेष्ठ, सुदीप अधिकारी, रुपन ढुंगाना, परिवेश दंगाल र मनिषकुमार यादवले प्रशिक्षण प्रदान गरेका थिए।
टेक स्पायर कलेजका सीईओ आशिष प्रसाईंले शिक्षादीपसँगको सहकार्यप्रति सन्तोष व्यक्त गर्दै आइटी क्षेत्रमा विश्वव्यापी रूपमा दक्ष जनशक्तिको माग तीव्र गतिमा बढिरहेको बताए।
“आइटीमा अथाह सम्भावना छन्। सीप र प्रविधि जानेको जनशक्तिले बेरोजगार बस्नुपर्दैन,” उनले भने।
कलेजका प्राचार्य ज्ञानबहादुर खड्काले उत्कृष्ट प्रदर्शन गर्ने विद्यार्थी समूहलाई नगद पुरस्कारसहित सम्मान गरिने जानकारी दिँदै प्रविधि शिक्षाको महत्वबारे प्रकाश पारे।
“प्रविधिको ज्ञान बिना आजको प्रतिस्पर्धी संसारमा अगाडि बढ्न सकिँदैन। प्रविधियुक्त जनशक्तिले विश्वको जुनसुकै स्थानमा पनि रोजगारीको अवसर पाउन सक्छ,” उनले भने।
खड्काले कलेजले विगतदेखि नै प्रविधिलाई उच्च प्राथमिकता दिँदै आएको र विद्यार्थीहरू कुनै पनि क्षेत्रमा कमजोर नहोउन् भन्ने उद्देश्यले उचित वातावरण सिर्जना गरेको बताए।
शिक्षादीप कलेजले नियमित पठनपाठनका साथै कविता, वक्तृत्वकला, वादविवाद, हाजिरीजवाफ, खेलकुद तथा अन्तरकलेज प्रतियोगिताजस्ता अतिरिक्त क्रियाकलापमार्फत विद्यार्थीको समग्र विकासमा निरन्तर जोड दिँदै आएको छ।
कलेजका निर्देशक रामचन्द्र अधिकारीका अनुसार यस किसिमको कार्यक्रम हरेक वर्ष आयोजना गर्दै आइएको छ र उत्कृष्ट अवधारणा प्रस्तुत गर्ने विद्यार्थीलाई पुरस्कृत गरिने जानकारी दिए।
