विराटनगर । मोरङको कानेपोखरी गाउँपालिकामा श्रीमानको खुकुरी प्रहारबाट एक महिला घाइते भएकी छन् ।
कानेपोखरी-७ की ३० वर्षीया कविता तामाङ श्रीमान् ३३ वर्षीय हीराधन तामाङको खुकुरी प्रहारबाट घाइते भएकी हुन् ।
खुकुरी प्रहारको आरोपमा प्रहरीले कविताका श्रीमान् हीराधनलाई आइतबार राति नियन्त्रणमा लिएको छ ।
आइतबार राति १० बजेतिर हीराधनले मादक पदार्थ सेवन गरी श्रीमतीलाई मार्ने उद्देश्यले खुकुरी प्रहार गरेका थिए ।
श्रीमानले हानेको खुकुरी रोक्ने क्रममा कविता घाइते भएकी हुन् ।
खुकुरी प्रहारबाट दुवै हातका हत्केलामा गहिरो चोट लागेकी कविताको अहिले विराटनगरस्थित नोबेल मेडिकल कलेज शिक्षण अस्पतालमा उपचार भइरहेको छ ।
छिमेकीहरूका अनुसार हीराधन झण्डै ११ वर्ष मलेसिया बसेर ६ महिनाअघि घर फर्किएका थिए । तामाङ दम्पत्तिबीच यसअघि पनि सामान्य झगडा भइरहने गरेको बताइएको छ ।
