विराटनगर । अस्पतालले उपचार नगरी फर्काइदिएपछि सात वर्षीया एक बालिकाको मृत्यु भएको छ ।
मृत्यु हुनेमा बागलुङ निसीखोलाकी सात वर्षीया बालिका सेन्जल शाही रहेकी छन् ।
कान्ति बाल अस्पातालले उपचार नगरी फर्काएकी सेन्जलको चाबहिलस्थित नेपाल–भारत मैत्री अस्पतालमा उपचारको क्रममा आइतबार मृत्यु भएको हो ।
ती बालिकाको उपचारमा सरोकार राख्दै आएका लक्ष्मण दत्त सुवेदीका अनुसार गएको मंगलबार राति पौने १२ बजे कान्ति बाल अस्पतालको इमर्जेन्सीमा पुर्याइएको थियो ।
तर, बालिकालाई कान्तिले भर्नै नगरी फिर्ता पठाएको थियो । सिकिस्त बालिकालाई भर्ना नै नगरी फर्काएपछि अस्पताल प्रशासनको चौतर्फी आलोचना भइरहेको छ ।
गम्भीर अवस्थाकी बालिकालाई पिआइसियूमा राखेर उपचार गर्नुपर्ने भन्दै कान्तिका चिकित्सकले फिर्ता पठाएका थिए । त्यतिबेला अस्पतालमा पिआइसियू बेड खाली नभएको उनीहरुको दाबी छ ।
मंगलबार राति कान्तिले बालिकालाई फिर्ता पठाउँदा उनका अभिभावकले बालिकाको अवस्था गम्भीर भइसकेको भन्दै आइसियू वा भेन्टिलेटरमा राखेर उपचार गर्न हारगुहार गरेका थिए ।
तर, अभिभावकको हारगुहारलाई बेवास्ता गर्दै त्यहाँका चिकित्सकले बालिकालाई बाहिर लैजान भन्दै भर्ना नगरी फिर्ता पठाएका थिए ।
कान्तिमा १ घण्टा अक्सिजनबिना होल्ड भएर फर्काइँदा बालिकाको अवस्था अझ गम्भीर बनेको उनले बताए ।
सरकारी अस्पतालले फर्काइदिएपछि बाध्यताले निजी अस्पतालमा उपचार गर्नुपर्दा बालिकाका अभिभावकले थप ८ लाख ऋणसमेत बोक्नु पर्ने अवस्था सिर्जना भएको सुवेदीको भनाइ छ ।
यता, अस्पताल प्रशासनले पिआइसियू बेड नभएका कारण बिरामी फर्काउनुपरेको दाबी गरेको छ ।
