विराटनगर । मोरङको बूढीगंगा गाउँपालिकाबाट पछिल्लो दुई दिनमा लागुऔषध गाँजासहित दुई जना महिला पक्राउ परेका छन् ।
शुक्रबार र शनिबार बूढीगंगाका भिन्दाभिन्दै स्थानबाट दुई महिलालाई पक्राउ गरिएको मोरङ प्रहरीले जानकारी दिएको छ ।
ती महिलाको घरमा खानतलासी गर्दा ६ किलो गाँजा बरामद भएको मोरङ प्रहरीका प्रवक्ता प्रहरी नायब उपरीक्षक रन्जनकुमार दाहालले जानकारी दिए ।
डिएसपी दाहालका अनुसार पक्राउ पर्नेमा बूढीगंगा-२ की ३५ वर्षीया रिनादेवी सिंह र बूढीगंगा-५ की ४५ वर्षीया मुनिया खातुन रहेकी छन् ।
घरबाट पाँच किलो गाँजा बरामद भएपछि सिंहलाई शुक्रबार साँझ ५ बजेतिर इलाका प्रहरी कार्यालय नेमुवाबाट खटिएको टोलीले पक्राउ गरेको थियो ।
उनले घरमा लुकाएर राख्दै गाँजा बिक्री गर्ने गरेको खुलेको प्रहरीले जनाएको छ ।
खातुन भने शनिबार पक्राउ परेकी हुन् ।
शनिबार दिउँसो छापा हान्दा एक किलोग्राम गाँजा बरामद भएपछि उनी पक्राउ परेकी हुन् ।
