विराटनगर । नेपाल पश्चिम एसियन फुटबल फेडेरेसन महिला च्याम्पियनसिप (वाफ)को फाइनलमा प्रवेश गरेको छ ।
मंगलबार साउदी अरेबियाको प्रिन्स अब्दुल्लाह अल फैसल रंगशालामा भएको खेलमा लेबनानविरुद्ध पुनरागमन जित निकाल्दै नेपालले फाइनलमा स्थान पक्का गरेको हो ।
सावित्रा भण्डारी ‘साम्बा’ र प्रीति राईको गोलमा नेपालले लेबनानलाई २-१ ले हराउँदै फाइनलमा स्थान बनाएको हो ।
दोस्रो हाफको इन्जुरी समयमको अन्तिममा प्रिती राईले गरेको गोलसँगै नेपालले पुनरागमन जित निकालेको हो ।
त्यसअघि नेपालकै पूजा रानाबाट भएको आत्मघाती गोलबाट लेबनानले अग्रता बनाएको थियो ।
३८औँ मिनेटमा पूजाले ‘ब्याक पास’ दिएको बलमा गोलकिपर एन्जिला तुम्बाप्पो सुब्बा चनाखो नरहँदा नेपालले गोल व्यहोरेको थियो ।
तर, ७६औँ मिनेटमा सावित्रा भण्डारीको गोलमा नेपाल खेलमा फर्कियो ।
इन्जुरी समयको अन्तिम मिनेटमा प्रीति राईले उत्कृष्ट गोल गरेपछि नेपालले २–१ को रोमाञ्चक जीत निकाल्दै फाइनल यात्रा तय गरेको हो ।
नेपालले अब उपाधिका लागि साविक विजेता जोर्डनको सामना गर्नेछ ।
यसअघि जोर्डनले मंगलबार नै भएको पहिलो सेमिफाइनलमा प्यालेस्टाइनलाई ५–० ले हराउँदै फाइनलमा स्थान बनाएको थियो ।
प्रतियोगिताको फाइनल खेल भोलि बिहीबार हुनेछ ।
नेपालले पहिलो खेलमा सिरियालाई ४–१ गोल अन्तरले हराएको थियो ।
दोस्रो खेलमा नेपालले इराकलाई ५-० गोलान्तरले हराउँदै एक खेलअगावै सेमिफाइनलमा स्थान पक्का गरेको थियो ।
