भुटानी शरणार्थीका डाक्टरका रुपमा परिचित डा. भम्पा राईलाई दमक नगरपालिकाले निःशुल्क आवास सुविधा प्रदान गरेको छ ।
७५ वर्षीय डा. राईलाई नगरपालिकाले बाँचुन्जेलसम्म बस्नलाई आवास सुविधा दिने भएको हो ।
मिर्गौला रोगबाट पीडित पत्नीको दुई वर्षअघि निधन भएयता उनी दमकमा एक्लै बसिरहेका छन् ।
हर्नियाले पीडित डा. राई पेटसम्बन्धी रोगबाट समेत ग्रसित छन् । तीन दशकदेखि भुटानी शरणार्थी फिर्ती आन्दोलनको नेतृत्व गर्दै आएका डा. राई शरणार्थी शिविरमा नबसी छुट्टै बस्दै आएका थिए ।
दमक नगरपालिका प्रमुख रोमनाथ ओलीका अनुसार डा. राईका लागि नगरपालिकाले दमक–५ मा आवास व्यवस्था मिलाइदिएको छ ।
भुइँतलाको तीनवटा कोठा र किचनसहितको फ्लाट व्यवस्था गरिएको प्रमुख ओलीले द शब्द एक्सप्रेसलाई जानकारी दिए । घरभाडाबापत नगरपालिकाले मासिक दश हजार तिर्ने सम्झौता भएको छ ।
निःसन्तान रहेका डा. राईले हाल गजुरमुखी क्लिनिकमा बसेर स्वास्थ्य सेवा दिइरहेका छन् । भुटानमा रहँदा भुटानी राजाका निजी डाक्टर रहेका राई सन् १९९१ मा भुटानबाट नेपालीभाषी लखेटिँदा स्वेच्छाले नेपाल आएका थिए ।
हेर्ने कथा युट्यूब च्यानलमार्फत सार्वजनिक भएको ‘माटोको कथा’ भिडियोले उनलाई नेपालमा विशेष चर्चा दिएको थियो ।
नगरपालिकाले आफ्नो लागि आवास व्यवस्था गरिदिएको प्रति डा. राईले खुशी व्यक्त गरेका छन् ।
आफूसँगै नेपाल आएका भुटानी शरणार्थी तेस्रो मुलुकमा पुगे पनि डा. राई अझै भुटान फर्कने सपना बोकेर बाँचिरहेका छन् ।
