आउँदो स्थानीय तहको निर्वाचनमा एमाले एक्लैले ७० प्रतिशतसम्म सिट जित्ने नेकपा एमालेका अध्यक्ष केपी शर्मा ओलीले दाबी गरेका छन् ।
अखिल नेपाल महिला सङ्घको सातौँ राष्ट्रिय सम्मेलन आयोजक कमिटीको तेस्रो पूर्ण बैठकलाई सम्बोधन गर्ने क्रममा अध्यक्ष ओलीले यस्तो दाबी गरेका हुन् ।
नेपालमा प्रतिस्पर्धात्मक बहुदलीय व्यवस्था रहेकाले सोही अनुसार आफूहरू प्रतिस्पर्धा गर्न र त्यसमा विजयी हुन तयार रहेको ओलीले बताए ।
‘हामीलाई चुनाव जित्न कसैको वैशाखी टेक्न आवश्यक छैन’ सम्बोधन गर्दै अध्यक्ष ओलीले भने, ‘सिट सङ्ख्या, पालिका लगायत अन्य सबै हिसाबले एमालले ६०-७० प्रतिशत स्थानीय तहमा एक्लै चुनाव जित्न सक्ने सामथ्र्य राख्छ ।’
चुनावमा सबैलाई रिझाएर जान नसकिने भन्दै अध्यक्ष ओलीले एक्लै चुनाव लड्ने तरिकाले तयारी सुरू गर्न नेता-कार्यकर्तालाई आग्रह गरे ।
‘प्रतिस्पर्धात्मक प्रणाली हामी आफैंले रोजको व्यवस्था हो त्यसकारण हामी लड्न तयार रहनुपर्छ । अन्य पार्टीलाई मिलाउने, सर्वसम्मत् गर्ने कुरा भन्न र सुन्न मिठा होलान् तर चुनावमा त्यो सम्भव हुन्छ त ?’ चुनावको तयारी गर्न निर्देशन दिँदै ओलीले भने, ‘त्यसैले चुनाव एक्लै लड्ने गरी तयारी गर्नुहोस् । स्वस्थ प्रतिस्पर्धामा सहभागी बनौँ ।’
राजनीतिक प्रतिस्पर्धाको निर्णायक थलो जनताको अभिमत हुने भएकाले वर्तमान राजनीतिक अवस्थानमा नेपाली जनताको निणर्य थाहा पाउन एमाले तयार रहेको अध्यक्ष ओलीले बताएका छन् ।
