इजिप्टले ३३औँ संस्करणको अफ्रिका कप अफ नेसन्समा पहिलो जित दर्ता गरेको छ । शनिबार राति समूह चरणको दोस्रो खेलमा इजिप्टले गुइनिया–बिसाउमाथि १–० गोलको जित निकालेको हो ।
यसअघि इजिप्टले पहिलो खेलमा नाइजेरियासँग १–० गोलको हार बेहोरेको थियो । गए राति क्यामरुनको गरौदामा भएको खेलमा इजिप्टलाई जिताउन कप्तान मोहम्मद सलाहले निर्णायक गोल गरे ।
खेलको पहिलो हाफ गोलरहित बराबरीमा सकिएको थियो । सलाहले ६०औँ मिनेटमा गोल गर्दै इजिप्टलाई जिताए । जारी संस्करणको यस प्रतियोगितामा सलाहको यो पहिलो गोल हो ।
जितसँगै समूह ‘डी’को दोस्रो स्थानमा रहेको इजिप्टले दुई खेदमा तीन अङ्क जोडेको छ । बिसाउ भने एक अङ्कका साथ तेस्रो स्थानमा छ ।
