काठमाडौँ— हास्य रियालिटी शो कमेडी नाइट विथ च्याम्पियन्सको ४७ औँ एपिसोडमा महेश बस्नेत अतिथि रूपमा सहभागी भएपछि प्रमुख प्रायोजक होन्डाले कार्यक्रमबाट आफ्नो प्रायोजन फिर्ता लिएको छ।
कार्यक्रमका निर्देशक भण्डारीका अनुसार राजनीतिक व्यक्तित्वलाई अतिथि बनाइएको विषयमा असन्तुष्टि जनाउँदै होन्डाले प्रायोजन फिर्ता लिएको जानकारी हिमालयन टेलिभिजनमार्फत प्राप्त भएको हो। “राजनीतिक अतिथि निम्त्याएकोप्रति असन्तुष्टि जनाउँदै प्रायोजन फिर्ता लिएको सूचित गरियो। त्यसपछि तयार भइसकेको एपिसोडबाट दिनभरि लगाएर होन्डाको लोगो धमिलो बनाइयो,” उनले बताए।
बुझिएअनुसार ४७ औँ एपिसोडको झलक सार्वजनिक भएपछि नै होन्डाले उक्त एपिसोडको प्रसारण स्थगित गर्न टेलिभिजन व्यवस्थापनलाई दबाब दिएको थियो। तर, व्यवस्थापन पक्षले प्रायोजकलाई अतिथि मन नपरेकै कारण कार्यक्रम रोक्नु गैरव्यावसायिक हुने अडान लिएको जनाएको छ।
सहमति जुट्न नसकेपछि होन्डाले इमेलमार्फत सो एपिसोडबाट आफ्नो चिन्ह हटाउन अनुरोध गरेको बताइएको छ। प्रायोजन फिर्तापछि कार्यक्रम र प्रायोजकबीचको सम्बन्धलाई लिएर विभिन्न चर्चा सुरु भएको छ।
