नेपाल पत्रकार महासंघका निवर्तमान केन्द्रीय अध्यक्ष विपुल पोख्रेल नेपाली कांग्रेसको सक्रिय राजनीतिमा अघि बढेका छन्। पार्टीको १५औँ महाधिवेशनअन्तर्गत दाङ क्षेत्र नम्बर २ बाट महाधिवेशन प्रतिनिधिमा निर्वाचित पोख्रेलले अब कांग्रेस लुम्बिनी प्रदेशको महामन्त्री पदमा उम्मेदवारी दिने घोषणा गरेका छन्।
प्रदेश नेतृत्वमा आफ्नो दाबी प्रस्तुत गरेका पोख्रेलले पछिल्लो समय पार्टीका नेता तथा कार्यकर्तासँग भेटघाट र छलफललाई तीव्रता दिएका छन्। उनले बुधबार दाङको घोराहीमा आयोजित एक भेलामार्फत औपचारिक रूपमा महामन्त्री पदमा उम्मेदवारी घोषणा गर्दै सहयोगका लागि अपिल गरेका हुन्।
भेलामा कांग्रेस उपसभापति भुवन श्रेष्ठ, महामन्त्री सुरेन्द्र आचार्य र कोषाध्यक्ष प्रकाश रानालगायत नेता तथा कार्यकर्ताको उपस्थिति थियो। पोख्रेलले पार्टीको प्रदेश संरचनालाई बलियो बनाउने र यसको महत्व स्थापित गर्ने उद्देश्यले महामन्त्री पदमा उम्मेदवारी दिने निर्णय गरेको बताएका छन्।
कांग्रेसको १५औँ महाधिवेशनअन्तर्गत जिल्ला र प्रदेश अधिवेशन हुन बाँकी रहेकाले लुम्बिनी प्रदेशमा आन्तरिक चुनावी सरगर्मी बढेको छ। प्रदेश सभापति पदका लागि उपसभापति भुवन श्रेष्ठ र महामन्त्री सुरेन्द्र आचार्यले पनि आफ्नो दाबेदारी प्रस्तुत गर्दै जिल्ला दौडाहलाई तीव्र बनाएका छन्।
त्यस्तै, अर्का उपसभापति राजु खनालले पनि प्रदेश सभापतिमा उम्मेदवारी दिने घोषणा गरेका छन्। महामन्त्री पदमा पोख्रेलसँगै प्रदेश कोषाध्यक्ष प्रकाश राना पनि आकांक्षी देखिएका छन्।
प्रदेश नेतृत्वका लागि नेताहरूले आफ्नो पक्षमा समर्थन जुटाउने प्रयास गरिरहेका बेला वर्तमान प्रदेश सभापति अमरसिंह पुन भने सर्वसम्मत नेतृत्व चयनको पक्षमा देखिएका छन्। आकांक्षीहरूले उम्मेदवारी घोषणा गर्नु स्वाभाविक भए पनि आफ्नो अधिकतम प्रयास प्रदेश कार्यसमितिलाई सर्वसम्मत बनाउने रहने उनले बताएका छन्।
प्रदेश नेतृत्वका आकांक्षीहरूबीच भेटघाट र छलफल जारी रहँदा लुम्बिनी कांग्रेसको आगामी अधिवेशन थप प्रतिस्पर्धात्मक बन्ने संकेत देखिएको छ।