सी चिनफिङ ट्रम्पलाई स्वागत गर्न ग्रेट हल अफ द पिपुलको सिँढीबाट तल झरेका थिए । बीबीसीका अनुसार रेड कार्पेटमा दुवै नेताबीच भेट भएको थियो भने त्यहाँ चिनियाँ सैन्य टोली पनि तैनाथ गरिएको थियो ।
तियानमेन स्क्वायरको पश्चिममा रहेको ग्रेट हल अफ द पिपुल चीनको प्रमुख सरकारी भवन हो । यहाँ सरकारी कार्यक्रम तथा विदेशी नेताहरूको स्वागत गरिन्छ ।
ट्रम्प बुधबार बेइजिङ पुगेका थिए । उनको स्वागत चीनका उपराष्ट्रपति हान झेङले गरेका थिए । त्यसपछि ट्रम्प फोर सिजन्स होटलमा बसेका थिए ।
आज हुने द्विपक्षीय वार्तापछि साँझ राजकीय भोज आयोजना गरिने जनाइएको छ । ट्रम्पको प्रतिनिधिमण्डलमा एलन मस्क, जेन्सन ह्वाङ लगायत अमेरिकी प्रविधि कम्पनीका प्रमुख कार्यकारी अधिकृतहरू सहभागी छन् ।
ट्रम्पको स्वागतका क्रममा ब्रास ब्यान्डको धुन, झण्डा फहराइरहेका मानिसहरूको प्रस्तुति तथा ‘वेलकम वेलकम, अ वार्म वेलकम’ नारासमेत लगाइएको थियो । कार्यक्रममा अमेरिका र चीनका झण्डा पनि प्रदर्शन गरिएको थियो, जसलाई दुई देशबीचको सम्बन्ध सुधारको संकेतका रूपमा हेरिएको छ ।
विश्लेषकहरूका अनुसार चीनले उपराष्ट्रपति हान झेङलाई स्वागतका लागि पठाउनु ट्रम्पप्रति विशेष सम्मानको संकेत मानिएको छ । यसअघि सन् २०१७ मा ट्रम्पको भ्रमणका बेला चीनले तल्लो तहका अधिकारीलाई स्वागतका लागि पठाएको थियो ।
