एजेन्सी । चीनले अफ्रिकाका अधिकांश देशहरूसँग व्यापार सहज बनाउने उद्देश्यले महत्वपूर्ण निर्णय गर्दै ५३ अफ्रिकी देशबाट आयात हुने सामानमा भन्सार शुल्क हटाउने घोषणा गरेको छ। शुक्रबारदेखि लागू हुने यस व्यवस्थाअनुसार एस्वाटिनी बाहेक सबै अफ्रिकी देशहरूले शून्य–ट्यारिफ सुविधा पाउने भएका छन्।
यसअघि चीनले सन् २०२४ डिसेम्बरसम्म ३३ वटा अति कम विकसित अफ्रिकी देशहरूका लागि ड्युटी–फ्री नीति लागू गरिसकेको थियो। नयाँ निर्णयसँगै अब यो सुविधा विस्तार भएर ५३ देशमा लागू हुने भएको हो। उक्त व्यवस्था सन् २०२८ अप्रिल ३० सम्म कायम रहने बताइएको छ।
चीनले आफू अफ्रिकालाई एकतर्फी रूपमा शून्य–कर सुविधा दिने पहिलो ठूलो अर्थतन्त्र भएको दाबी गरेको छ।
तर, केही विश्लेषकहरूले भने यस कदमलाई सफ्ट पावर विस्तार गर्ने रणनीतिक प्रयासका रूपमा व्याख्या गरेका छन्। उनीहरूका अनुसार अफ्रिकी देशहरूको मुख्य चुनौती केवल भन्सार शुल्क नभई उत्पादन क्षमता, पूर्वाधार विकास र व्यापार सन्तुलनसँग पनि जोडिएको छ।
