काठमाडौं – पश्चिम अफ्रिकी देश मालीका रक्षामन्त्री सादियो केमाराको आत्मघाती ट्रक विस्फोटमा मृत्यु भएको छ।राजधानी बमाको नजिकै रहेको उनको निवासलाई लक्षित गर्दै भएको विस्फोटमा उनी गम्भीर घाइते भएका थिए। पछि उपचारका क्रममा मृत्यु भएको परिवार र सरकारी सञ्चार माध्यमले पुष्टि गरेका छन्।
उक्त आक्रमणमा राष्ट्रपति असीमी गोइटाको निवासलाई समेत निशाना बनाइएको बताइएको छ। उनलाई सुरक्षित स्थानमा सारिएको छ।
हाल मालीमा हिंसा र अस्थिरता बढ्दो क्रममा रहेको छ। राजधानी बमाकोसहित विभिन्न सहरमा चरमपन्थी समूहहरूले समन्वयात्मक आक्रमण गरेका छन्। सैनिक ब्यारेक, रक्षामन्त्रीको घर लगायतका स्थानमा आक्रमण भएको जनाइएको छ।
आक्रमणको जिम्मा जमाअत नुसरत अल–इस्लाम वाल–मुस्लिमीन (जेएनआईएम) ले लिएको छ। उसले आजावाद लिबरेसन फ्रन्ट (एफएलए) सँग मिलेर आक्रमण गरेको जनाएको छ।
विश्लेषकहरूका अनुसार यस स्तरको समन्वयात्मक आक्रमणले मालीको सुरक्षा अवस्था कमजोर भएको संकेत गरेको छ। सन् २०२० र २०२१ का सैन्य विद्रोहपछि सत्तामा आएका गोइटाले सुरक्षा सुधार गर्ने वाचा गरे पनि देश अझै अस्थिर अवस्थामै रहेको छ।
फ्रान्ससँग सम्बन्ध तोडेर रुससँग सहकार्य थालेपछि पनि मालीको सुरक्षा स्थिति सुधार हुन सकेको छैन। हाल केही रुसी सैनिक फिर्ता बोलाइएकाले सुरक्षा चुनौती झन् बढेको बताइएको छ।
