विराटनगर — विराटनगरस्थित अरनिको कलेज मा कक्षा ११ र १२ मा अध्ययनरत विद्यार्थीहरूका लागि आयोजना गरिएको दुई महिने आर्टिफिसियल इन्टेलिजेन्स (एआई) तालिम सम्पन्न भएको छ।
सयपत्री ग्रुप को आयोजनामा सम्पन्न उक्त तालिममा कलेजका १०० भन्दा बढी विद्यार्थी सहभागी भएका थिए।
गत मंसिर २६ गतेदेखि सुरु भएको तालिमको अन्तिम दिन विद्यार्थीहरूले प्रयोगात्मक अभ्यासअन्तर्गत विभिन्न प्रोजेक्टहरू प्रदर्शन गरेका थिए। सहभागी विद्यार्थीहरूलाई बिजनेस, शिक्षा र स्वास्थ्य गरी तीन प्रमुख विधामा विभाजन गरी प्रोजेक्ट कार्य गराइएको सयपत्री ग्रुपका डाइरेक्टर श्याम कृष्ण गुप्ता ले जानकारी दिए।
तालिममा सहभागी २२ विद्यार्थी समूहमध्ये उत्कृष्ट ९ समूह फाइनल चरणमा पुगेका छन्। प्रत्येक समूहमा २ देखि ६ जनासम्म विद्यार्थी सहभागी थिए। प्रत्येक विधाबाट एक–एक विजेता समूह घोषणा गरिने र उनीहरूलाई २५ हजार रुपैयाँ बराबरको गिफ्ट ह्याम्पर तथा पुरस्कार प्रदान गरिने आयोजकले जनाएको छ।
तालिममा प्रशिक्षकका रूपमा अनिस दाहाल, श्याम कृष्ण गुप्ता र रबिन पौडेल रहेका थिए। निर्णायकको भूमिकामा इन्जिनियर अभय कर्ण र इन्जिनियर विकास गुप्ता रहेका थिए।
समापन कार्यक्रममा बोल्दै कलेजका प्रिन्सिपल राजेश कार्की ले विद्यार्थीहरूलाई किताबी ज्ञानसँगै प्रविधिमा पनि दक्ष बनाउन यस्ता अतिरिक्त गतिविधिलाई प्राथमिकता दिइएको बताए। उनले विद्यार्थीको सर्वाङ्गीण विकासका लागि आधुनिक प्रविधि र प्रयोगात्मक शिक्षालाई निरन्तर प्राथमिकता दिइने उल्लेख गरे।
