सिड्नी, अष्ट्रेलिया— एभरेस्ट मार्शल आट्र्स एकेडेमीले अष्ट्रेलियाको प्रतिष्ठित ‘एनएसडब्लु (न्यू साउथ वेल्स) स्टेट अल स्टाइल कराँते च्याम्पियनसिप २०२६’ प्रतियोगितामा ऐतिहासिक सफलता हासिल गरेको छ।
एकेडेमीले आफ्नो पहिलो सहभागितामै दुई स्वर्ण र एक रजत पदक जित्दै उल्लेखनीय उपलब्धि हात पारेको हो।
एकेडेमीका मुख्य प्रशिक्षक मुकुन्द्र महर्जनले मेन्स भेट्रान (३०–४० वर्ष) समूहमा उत्कृष्ट प्रदर्शन गर्दै स्वर्ण पदक जित्नुभयो। त्यसैगरी, सिनियर महिला ७५ केजी तौल समूहमा लक्ष्मी भट्टले उत्कृष्ट खेल प्रदर्शन गर्दै अर्को स्वर्ण पदक जित्नुभयो।
उदीयमान खेलाडी आयत महर्जनले ८–९ वर्षको जुनियर विधामा कडा प्रतिस्पर्धाबीच रजत पदक जित्दै भविष्यको सम्भावनाशील खेलाडीका रूपमा आफूलाई स्थापित गर्नुभयो।
एकेडेमीले यस ऐतिहासिक उपलब्धिको श्रेय खेलाडी तथा प्रशिक्षकहरूको कडा परिश्रम, मेहनत र अनुशासनलाई दिएको छ। एनएसडब्लुमा छोटो समयमै राम्रो प्रगति गर्न सफल भएको एकेडेमीले जनाएको छ।
मुख्य प्रशिक्षक मुकुन्द्र महर्जनको अथक परिश्रम र नेतृत्वका कारण यो उपलब्धि सम्भव भएको भन्दै एकेडेमीले उहाँको विशेष प्रशंसा गरेको छ। पहिलो सहभागितामै तीन पदक जित्नुले विदेशमा पनि नेपाली मार्शल आट्र्सको स्तर अझ उचाइमा पुग्ने स्पष्ट संकेत दिएको एकेडेमीको विश्वास छ।
