विराटनगर— विराटनगर–१० मा रहेको अर्किड स्कुलले आफ्नो वार्षिकोत्सव तथा अभिभावक दिवस विविध कार्यक्रमका साथ भव्य रूपमा मनाएको छ। शनिबार विद्यालय परिसरमा आयोजित विशेष समारोहबीच कार्यक्रम सम्पन्न भएको हो।
कार्यक्रमलाई सम्बोधन गर्दै विद्यालयका प्रिन्सिपल मनिष भट्टराईले अर्किड स्कुलले केवल किताबी ज्ञान मात्र नभई विद्यार्थीहरूलाई गुणस्तरीय शिक्षासँगै सीप र संस्कारसमेत प्रदान गर्दै आएको बताए। उनले विद्यार्थीहरूको सर्वाङ्गीण विकास तथा जीवनोपयोगी शिक्षा उपलब्ध गराउने सवालमा विद्यालय सधैँ अग्रणी रहेको उल्लेख गरे।
कार्यक्रममा निजी तथा आवासीय विद्यालय अर्गनाइजेसन नेपाल (प्याब्सन) विराटनगरका अध्यक्ष अर्जुन श्रेष्ठले वर्तमान समयमा प्रविधिमैत्री शिक्षाको आवश्यकता औँल्याउँदै विद्यार्थीहरूलाई प्रविधिसँग जोडेर सीप र संस्कारयुक्त शिक्षा दिनुपर्नेमा जोड दिए।
त्यसैगरी विद्यालयका अध्यक्ष अमित ढकालले गुणस्तरीय शिक्षाकै कारण अर्किड स्कुल विद्यार्थी तथा अभिभावकको रोजाइमा पर्न सफल भएको बताए। विद्यालयका निर्देशक दिपेश बास्तोलाले उत्कृष्ट शैक्षिक वातावरण र गुणस्तरीय शिक्षा प्रदान गर्न विद्यालय सदैव प्रतिबद्ध रहेको विश्वास व्यक्त गरे।
सो अवसरमा विद्यालयले पूर्व विद्यार्थीहरू तथा विभिन्न विधामा उत्कृष्ट ठहरिएका विद्यार्थीहरूलाई सम्मान गरेको थियो। कार्यक्रममा विद्यार्थीहरूले विविध सांस्कृतिक नृत्य तथा गायन प्रस्तुत गर्दै अभिभावक र पाहुनाहरूलाई मनोरञ्जन प्रदान गरेका थिए।
