विराटनगर – १७औँ रतुवामाई नगरपालिका स्तरीय राष्ट्रपति रनिङ शिल्ड प्रतियोगिताको उपाधि राष्ट्रनिर्माण बोर्डिङ इटहराले जितेको छ। रतुवामाई नगरपालिका–६ स्थित सौँठा माध्यमिक विद्यालयमा फागुन १० देखि १२ गतेसम्म सम्पन्न तीनदिने प्रतियोगितामा २३ पदकसहित राष्ट्रनिर्माण प्रथम भएको हो।
सौँठा माध्यमिक विद्यालयका लेखापाल धर्मराज पोखरेलका अनुसार २१ विद्यालयलाई पछि पार्दै राष्ट्रनिर्माणले ९ स्वर्ण, ७ रजत र ७ कास्यसहित उपाधि जितेको हो। प्रतियोगितामा ९ स्वर्ण, ४ रजत र ११ कास्यसहित २४ पदकका साथ जनता लोकनाथ होमादेवी मावि ठकठकिया दोस्रो तथा ५ स्वर्ण र ५ रजतसहित १० पदकका साथ सरस्वती मावि इटहरा तेस्रो भएका छन्।
२२ विद्यालय सहभागी प्रतियोगितामा कूल ४२ खेल समावेश थिए। एथलेटिक्सतर्फ १६, उफ्रने ६, फ्याक्ने ४, भलिबल २ र कवड्डी २ खेल सम्पन्न भएका थिए। मार्सल आर्टतर्फ कुमुतेका १० र काताका २ खेल सञ्चालन गरिएको शिक्षक अशोककुमार तामाङले जानकारी दिनुभयो।
समापन कार्यक्रममा पालिकाका जनप्रतिनिधि, कर्मचारी, शिक्षाप्रेमी तथा समाजसेवीहरूको उपस्थिति रहेको थियो।
