विराटनगर । हेरिटेज इन्टरनेसनल स्कुलले आज एक भव्य समारोहका बीच ‘अङ्ग्रेजी वक्तृत्वकला प्रतियोगिता’ र ‘कराँते बेल्ट अपग्रेडेशन’ कार्यक्रम सफलतापूर्वक सम्पन्न गरेको छ ।
बौद्धिक विकास र शारीरिक अनुशासनलाई सँगसँगै लैजाने विद्यालयको उद्देश्य अनुरूप आयोजित यस कार्यक्रममा विद्यार्थी, अभिभावक र शिक्षाविद्हरूको बाक्लो उपस्थिति रहेको थियो ।
कार्यक्रमको मुख्य आकर्षणको रूपमा रहेको कराँते बेल्ट अपग्रेडेशन अन्तर्गत ३० जनाभन्दा बढी विद्यार्थीहरू दीक्षित भएका छन् ।
उनीहरूले आफ्नो उत्कृष्ट मार्सल आर्ट कौशल प्रदर्शन गर्दै ‘एलो’ र ‘ग्रिन’ बेल्ट प्राप्त गरेका थिए । दीक्षित विद्यार्थीहरूलाई सम्बन्धित क्षेत्रका प्रशिक्षक तथा अतिथिहरूले बेल्ट र प्रमाणपत्र प्रदान गरी उज्ज्वल भविष्यको शुभकामना दिएका थिए ।
त्यसैगरी, ‘अङ्ग्रेजी वक्तृत्वकला प्रतियोगिता’ को अन्तिम प्रतिस्पर्धामा २० जना प्रतिभावान विद्यार्थीहरूले आ-आफ्नो तार्किक र प्रभावशाली मन्तव्य प्रस्तुत गरेका थिए ।
कडा प्रतिस्पर्धाका बीच मान्भी रौनियारले प्रथम स्थान हासिल गर्न सफल भइन् । त्यसैगरी रायना रेग्मी दोस्रो र बिवांशी मण्डलले तेस्रो स्थान प्राप्त गरिन् ।
विजयी विद्यार्थीहरूलाई विद्यालयका प्रधानाध्यापक तथा आमन्त्रित विशिष्ट अतिथिहरूले पदक र पुरस्कार वितरण गरेका थिए ।
कार्यक्रममा बोल्दै प्रमुख अतिथिहरूले विद्यार्थीहरूमा रहेको बहुमुखी प्रतिभाको प्रशंसा गर्दै शिक्षासँगै खेलकुद र वाक-कलाले व्यक्तित्व विकासमा महत्त्वपूर्ण भूमिका खेल्ने कुरामा जोड दिए ।
विद्यालय प्रशासनले सहभागी सबै विद्यार्थी र सहयोगी अभिभावकहरूलाई धन्यवाद ज्ञापन गर्दै कार्यक्रमको औपचारिक समापन गरेको थियो।
