विराटनगर । कोशी प्रदेश प्रहरी कार्यालय विराटनगरले जिल्ला प्रहरी कार्यालय ओखलढुंगाका प्रहरी नायव उपरीक्षक मदन केसीलाई २०८२ साल माघ महिनाको “सर्वोत्कृष्ट प्रहरी” घोषित गरेको छ ।
विभागीय मूल्य-मान्यता तथा आदेश-निर्देशनको पालना गर्दै उच्च मनोबल र साहसका साथ आफ्नो पदीय कर्तव्य निर्वाह गर्ने क्रममा प्रहरी नायव उपरीक्षक मदन के.सी. ले उल्लेखनीय कार्यसम्पादन गरेका छन् ।
ओखलढुंगाको चिशंखुगढी गाउँपालिका-६ भदौरे बोहोरेका ७४ वर्षीय चन्द्र बिक्रम राई र ८० वर्षीया चन्द्र माया राईलाई २०८२ साल माघ १३ गते अज्ञात व्यक्तिहरूले कोदालो प्रहार गरी बीभत्स हत्या गरी सुनका गरगहना तथा नगद समेत लुटेर फरार भएको घटनाको अनुसन्धानको क्रममा निज के.सी. ले घटनामा संलग्न २ जनालाई काठमाण्डौ महानगरपालिका-१५ बाट लुटेको सामान सहित माघ २३ गते पक्राउ गर्न सफल भए ।
यसैगरी, २०६७ साल असार २४ गते ओखलढुंगाको भदौरे गाउँ विकास समिति-२ का ४३ वर्षीय छविलाल कार्कीलाई कुटपिट गरी हत्या गरी फरार रहेका प्रतिवादीलाई उनले २०८२ साल माघ १७ गते अर्थात् पूरा १५ वर्षपछि पक्राउ गरी कानूनी दायरामा ल्याउन सफलता हासिल गरे ।
त्यसका अतिरिक्त, २०८२ साल मंसिर २८ गते ओखलढुंगाको खिजिदेम्वा गाउँपालिका-९ स्थानमा एक महिलामाथि जबरजस्ती करणी गरी फरार रहेका २७ वर्षीय प्रतिवादीलाई पनि माघ ४ गते नै पक्राउ गरी कानूनको दायरामा ल्याउन उनी सफल भए ।
यसरी जनमानसमा शान्ति-सुरक्षाको अनुभूति हुने किसिमले आफ्नो पदीय दायित्व तथा जिम्मेवारी उत्कृष्ट रूपमा निर्वाह गरेकोमा कोशी प्रदेश प्रहरी कार्यालयले प्रहरी नायव उपरीक्षक मदन के.सी. को कार्यको उच्च मूल्याङ्कन गर्दै उनलाई २०८२ साल माघ महिनाको “सर्वोत्कृष्ट प्रहरी” घोषणा गरेको हो ।
