विराटनगर । मोरङ निर्वाचन क्षेत्र नम्बर ५ का उम्मेदवार मनोजकुमार अग्रवालले आफ्नो चुनावी प्रतिबद्धता पत्र सार्वजनिक गरेका छन् । नेकपा (एमाले) का तर्फबाट मोरङ-५ का उम्मेदवार अग्रवालले विराटनगरमा सोमबार पत्रकार सम्मेलनको आयोजना गरी आफ्ना योजनाहरू सार्वजनिक गरेका हुन् ।
अग्रवालले आफ्नो लामो राजनीतिक र विद्यार्थी जीवनमा पार्टी तथा जनताको पक्षमा आवाज बुलन्द गर्दै आएको बताएका छन् । उनले क्षेत्रको समग्र विकास, शिक्षा, स्वास्थ्य, कृषि, उद्यम, संस्कृति र सामाजिक सुरक्षाका सवालमा व्यापक प्रतिबद्धता जनाउँदै प्रतिबद्धता पत्र सार्वजनिक गरेका हुन् ।
अग्रवालले ‘मेरो क्षेत्र, मेरो जिम्मेवारी’ भन्ने नाराका साथ आफ्नो योजनाहरू अघि सारेका छन्, जसमा भौतिक पूर्वाधार, शिक्षा, स्वास्थ्य, कृषि र पर्यटनलाई विशेष प्राथमिकता दिइएको छ ।
उम्मेदवार अग्रवालले सडक, पूर्वाधार र जलस्रोत व्यवस्थापनमा विशेष ध्यान दिने प्रतिबद्धता जनाएका छन् ।
रंगेली–विराटनगर हुलाकी मार्गको स्तरोन्नति र आधुनिक मार्गमा विकास, दक्षिणी सीमा क्षेत्रमा नयाँ पर्यटन मार्गको निर्माण, क्षेत्रभित्रका सम्पूर्ण सडक, नाला र बिजुली, खानेपानी तथा टेलिफोन जडान कार्य आगामी ५ वर्षभित्र सम्पन्न गर्ने योजना उनले सार्वजनिक गरेका छन् ।
साथै, स्वच्छ हरियाली र वृक्षारोपण, क्षेत्रीय विकास कोष स्थापना र तटबन्धन तथा सिंचाइ योजनामा विशेष पहल गरिनेछ ।
शिक्षा र स्वास्थ्य क्षेत्रमा अग्रवालले सबै सामुदायिक विद्यालयको स्तरोन्नति, आधुनिक कम्प्युटर र इन्टरनेटको व्यवस्था, खेलमैदान निर्माण, व्यावसायिक तालिम केन्द्र स्थापना र विद्यार्थीले काम गर्दै पढ्न सक्ने सुविधा सुनिश्चित गर्ने प्रतिबद्धता व्यक्त गरेका छन् ।
रंगेली अस्पताल तथा धनपालथान, जहदा र विराटनगरका स्वास्थ्य संस्थालाई आधुनिक र सुविधा सम्पन्न बनाउने योजना पनि उनले प्रस्तुत गरेका छन् । अग्रवालले उद्यम र रोजगारी प्रवर्धनमा विशेष ध्यान दिने जनाएका छन् ।
विराटनगर उद्योग क्षेत्र पुनःसक्रियकरण, कृषि तथा स्वरोजगारका तालिम सञ्चालन, कृषि उत्पादनको सहज बिक्री वितरण, नवउद्योग स्थापना र युवालाई रोजगारी तथा आत्मनिर्भर बनाउने योजना उनी सार्वजनिक गरेका छन् ।अग्रवालले धार्मिक स्थलको स्तरोन्नति, सांस्कृतिक संग्रहालय निर्माण, ऐतिहासिक स्थल र रिङरोडमार्गको विकास गरी पर्यटक आकर्षण बढाउने योजना जनाएका छन् ।
युवा, महिला, ज्येष्ठ नागरिक, निमुखा र अशक्त वर्गका लागि रोजगार, स्वास्थ्य सेवा, निःशुल्क बीमा, न्याय परामर्श र सामाजिक सुरक्षा कार्यक्रम प्रभावकारी बनाउने प्रतिबद्धता उनले व्यक्त गरेका छन् ।
उम्मेदवार अग्रवालले पार्टीको प्रतिबद्धता कार्यान्वयनसँगै मोरङ–५ लाई समग्र विकासको मूलधारमा ल्याउने र जनता खुसी बनाउने आफ्नो लक्ष्यमा जोड दिएका छन् । उनले निर्वाचनमा पार्टीको चुनाव चिन्ह सूर्यमा मत दिएर जित सुनिश्चित गर्न सबै मतदातालाई आग्रह गरेका छन् ।
अग्रवालको प्रतिवद्धता पत्रको मुख्य आकर्षण औद्योगिक पुनर्जागरण रहेको छ । विराटनगरमा रहेका ऐतिहासिक तर हाल बन्द अवस्थामा रहेका विराटनगर जुट मिल्सलाई पुनः सञ्चालनमा ल्याउने उनले प्रतिवद्धता जनाएका छन् ।
यस क्षेत्रलाई ‘विराट औद्योगिक क्षेत्र’ घोषणा गरी नयाँ उद्योगहरूको स्थापना र रोजगारी सिर्जना गर्ने उनको लक्ष्य छ । रंगेली–विराटनगर जोड्ने हुलाकी मार्गलाई आधुनिक मापदण्ड अनुसार स्तरोन्नति गर्ने र रंगेलीको चोप्राहा हुँदै दक्षिणी सीमा क्षेत्रमा पूर्व–पश्चिम नयाँ सडकमार्ग निर्माण गर्ने योजना अघि सारिएको छ ।
हरेक वडामा नमूना विद्यालय स्थापना गर्ने, गरिब तथा जेहेन्दार विद्यार्थीलाई निःशुल्क उच्च शिक्षाको व्यवस्था गर्ने र ‘कमाउँदै पढ्दै’ कार्यक्रम लागू गर्ने उनको योजना छ ।
स्वास्थ्यतर्फ रंगेली अस्पताललाई आधुनिक सुविधासम्पन्न बनाउने र विपन्न नागरिकका लागि निःशुल्क स्वास्थ्य बीमाको व्यवस्था गर्ने प्रतिवद्धतामा उल्लेख छ ।
ऐतिहासिक विराट राजाको दरबार क्षेत्र, काली मन्दिर, संसारी माई मन्दिर लगायतका धार्मिक तथा ऐतिहासिक स्थलहरूको संरक्षण र प्रवर्द्धन गरी यस क्षेत्रलाई पर्यटकीय हब बनाउने अग्रवालले बताए ।
वर्षौँदेखि समस्याको रूपमा रहेको भूमिहीन, सुकुम्वासी र दलित बस्तीको समस्या समाधान गरी उनीहरूलाई स्थायी बसोबासको व्यवस्था मिलाउने र हरेक घरमा स्वच्छ खानेपानी पुर्याउने प्रतिवद्धता पत्रमा उल्लेख छ ।
पत्रकार सम्मेलनमा बोल्दै उम्मेदवार अग्रवालले आफू यसै क्षेत्रको माटोमा हुर्किएको र यहाँका समस्याहरूसँग प्रत्यक्ष परिचित रहेकाले ती समस्या समाधान गर्न आफू पूर्ण रूपमा प्रतिबद्ध रहेको बताए ।
उनले फागुन २१ गते हुने प्रतिनिधि सभाको निर्वाचनमा आफूलाई सूर्य चिह्नमा मतदान गरी विजयी गराउन मतदाताहरूसँग अपिलसमेत गरे ।
फागुन २१ गते हुने प्रतिनिधिसभा निर्वाचनका लागि मोरङ ५ बाट १४ दलका र ८ स्वतन्त्र गरी २२ जनाको उम्मेदवारी परेको छ । मोरङ ५ मा एक लाख १० हजार एक सय ७७ मतदाता रहेका छन् ।
