नेपाल स्टक एक्सचेन्ज (नेप्से) सूचकमा बिहीबार दोहोरो अंकको सुधार आएको छ। यो साता बुधबारसम्म करिब ३२ अंकले घटेको नेप्से सूचक बिहीबार २७.१९ अंकले बढेर २७०८.७० बिन्दुमा पुगेको हो।
साताको सुरुदेखि अस्थिर देखिएको नेप्से सूचक बिहीबार कारोबार सुरु भएदेखि नै निरन्तर उकालो लागेको थियो, जुन बजार बन्द हुँदासम्म कायम रह्यो। कारोबार सुरु हुँदा २६८१.५ अंकमा रहेको नेप्से सूचक बढ्दै बन्दसम्म आइपुग्दा उल्लेख्य सुधार देखिएको हो। यससँगै सेन्सिटिभ इन्डेक्स पनि ४.४७ अंकले बढेको छ।
बिहीबार नेप्सेमा कारोबार भएका सेयरमध्ये ३ कम्पनीको सेयर मूल्यमा सकारात्मक सर्किट लागेको छ। सकारात्मक सर्किट लाग्ने कम्पनीमा कालिञ्चोक दर्शन, सुपर मादी हाइड्रोपावर र मोदी इनर्जी रहेका छन्। यस दिन २०१ कम्पनीको सेयर मूल्य बढेको छ भने ५५ कम्पनीको सेयर मूल्य घटेको छ। ४ कम्पनीको सेयर मूल्य स्थिर रहेको नेप्सेले जनाएको छ।
समूहगत सूचकतर्फ पनि अधिकांश समूहमा हरियाली देखिएको छ। बैंकिङ समूह ७.७१, विकास बैंक ५३.७८, वित्त १२.१६, होटल तथा पर्यटन १७.०७, जलविद्युत् ५८.५०, लगानी १.२८, जीवन बीमा १४३.८५, उत्पादन तथा प्रशोधन ६९.२१, लघुवित्त २९.५५, सामूहिक लगानी कोष ०.१२, निर्जीवन बीमा २१८.९२ र अन्य समूह ४६.२९ अंकले बढेका छन्। यद्यपि, व्यापार समूह भने १८.५१ अंकले घटेको छ।
कारोबार रकमतर्फ पनि बिहीबार उल्लेख्य सुधार देखिएको छ। नेप्सेमा ३२६ कम्पनीको १ लाख ८ हजार ८ सय १७ कारोबारबाट ११ अर्ब ५८ करोड रुपैयाँ बराबरको ३ करोड ५५ लाख ७४ हजार ६ सय २७ कित्ता सेयर खरिद–बिक्री भएको नेप्सेले जनाएको छ।
यसअघिल्लो दिन बुधबार नेप्सेमा ३२६ कम्पनीको ८० हजार ४ सय २२ कारोबारबाट ७ अर्ब ४९ करोड रुपैयाँ बराबरको १ करोड ६६ लाख ८२ हजार कित्ता सेयर किनबेच भएको थियो।
