विराटनगर । मोरङको धनपालथान गाउँपालिकास्थित उमागौरी कृषि सहकारी संस्थाका पूर्वअध्यक्ष शम्भुप्रसाद रौनियार कारागारको समय छल्न अस्पताल बसिरहेको खुलेको छ । मोरङ जिल्ला अदालतको आदेशअनुसार गत वर्षको माघ २० गते पूर्पक्षका लागि कारागार चलान भएका रौनियारले कारागारको सट्टा अस्पतालमा बसेर सजाय भुक्तान गरिरहेको खुलेको छ ।
धनपालथान–४ कर्सिया बजारमा रहेको उमागौरी कृषि सहकारी ठगी प्रकरणका मुख्य आरोपी रौनियारलाई पनि थुनामा परेपछि अन्य ‘भिआइपी’ मा देखिने स्वास्थ्य समस्या देखिएको हो । पक्राउ परिसकेपछि अन्य भिआइपीमा मुटुसम्बन्धी समस्या देखिने गरेकोमा रौनियारले पनि उस्तै समस्या देखाएर कारागारको समय छल्न अस्पतालमा भर्ना लिएका थिए । गत मंसिर १ गते जिल्ला कारागार मोरङको प्रशासनमा स्वास्थ्य समस्या औंल्याएर विराटनगरको न्युरो अस्पताल पुगेका उनी सोही दिन ‘रिफर’ लिएर मोरङ सहकारी अस्पताल पुगेका हुन् ।
विगत अढाइ महिनायता मुटुसँग सम्बन्धित विभिन्न स्वास्थ्य समस्या रहेको बाहना देखाउने गरेका रौनियारले अस्पतालबाट ‘डिस्चार्ज’ लिन समेत आनाकानी गरिरहेका छन् । अस्पतालले चार पटकसम्म हिरासतमा फर्किन सुझाव दिए पनि फर्किन नमानेका रौनियार अहिले हस्पिटल परिसरवरिपरि डुलडाल गर्ने र आफन्त भेट्ने गरेका छन् ।
रौनियारको उपचारमा संलग्न रहेको डा. दीपक सिग्देल र डा. रोशन खड्का सम्मिलित इन्टर मेडिसिनको टोलीले उनलाई अस्पताल बस्नै नपर्ने भन्दै हिरासत फर्काउने प्रयास गरेको मोरङ सहकारी अस्पतालका प्रशासन प्रमुख विकास अधिकारीले जानकारी दिए । उनका अनुसार पूर्ण रूपमा स्वस्थ महसुस नगरेको बाहना बनाउँदै रौनियारले हिरासत फर्किन आनाकानी गरिहेका छन् ।
मेडिकल फलोअप गर्ने भन्दै न्युरो अस्पताल हुँदै मोरङ सहकारी पुगेका रौनियारको मधुमेह नियन्त्रण नभएको, उच्च रक्तचाप कायमै भएको र प्यानिक अट्याक (बेला–बेला छाती दुख्ने) लगायत स्वास्थ्य समस्या देखाएका थिए । त्यसपछि डाक्टरको टोलीले उपचारपछि गाह्रो पर्दा मात्र आउनू भ न्दै डिस्चार्ज लिन भनेको थियो । तर, १ नम्बरको सिंगल क्याबिन लिएर अस्पताल बसिरहेका उनले अस्पतालको एउटा बेडमात्र नभएर दुई सुरक्षाकर्मीलाई पनि आफ्नो कब्जामा राखिरहेका छन् ।
‘उहाँ लामो समयदेखि नै आराम गरिरहनुभएको छ । अहिले कुनै स्वास्थ्य समस्या छैन, डिस्चार्ज गर्ने कन्टिसनमै हुनुहुन्छ र डाक्टरले पनि डिस्चार्ज गरिसक्नुभएको हो,’ अस्पतालका प्रशासन प्रमुख अधिकारी भन्छन्, ‘यसरी धेरै समय अस्पतालमा बस्नु हेल्थ प्रोटोकलविपरीत हुन जान्छ । एक जना बिरामीबाट अर्को बिरामीमा क्रस इन्फेक्सन हुन सक्छ ।
यता, मोरङ कारागार प्रशासनले भने गत माघमा पुर्पक्षका लागि कारगार आएर १० महिनाजति सजाय भुक्तान गरेका रौनियार स्वस्थ हुँदाहुँदै पनि नियमित स्वास्थ्य जाँचका लागि भन्दै न्युरो अस्पताल गएको जनाएको छ । त्यसैदिन ‘रिफर’ भएर मोरङ सहकारी अस्पताल पुगेपछि थप उपचार गर्नुपरेको भन्दै त्यहीँ बसेका थिए । अढाइ महिनाभन्दा बढी समय अस्पताल नै बसेर कारागार प्रशासनलाई अफ्ठेरो पार्न खोजेका रौनियारले जनशक्ति अभावका बीच पनि दुई सुरक्षाकर्मी साथमै राखेर झन् कठिन बनाएका छन् । उनको सुरक्षामा खटिएका दुई प्रहरीले आठ–आठ घण्टाको ड्युटी गर्दा जनशक्ति अभावले अझ झन्झट उत्पन्न भएको मात्रै छ्रैन राज्यस्रोतको पनि दुरुपयोग भएको कारागार प्रशासन स्रोतले जनाएको छ ।
अस्पतालबाटै थर्काउँछन् सहकारी पीडितलाई
उमागौरी कृषि सहकारी सञ्चालनमा ल्याउन सक्रिय भूमिका बहन गरेका रौनियार बचतकर्ताको रकम अपचलन गर्ने मुख्य अभियुक्त हुन् । सहकारीको २२ करोड ४८ लाख २७ हजार ७ सय रुपैयाँ हिनामिना गरेको उजुरी परेपछि उनी लामो समय फरार भएका थिए । उनीविरुद्ध गत वर्षको असोज २ गते अदालतले पक्राउ अनुमति दिएको थियो भने सोही माघ १४ गते उनी आफैं हाजिर भएका थिए ।
माघ २० गते मोरङ जिल्ला अदालतका न्यायाधीश अरुणकुमार झाको इजलासले रौनियारलाई थुनामा राखेर मुद्दाको पुर्पक्ष गर्न आदेश दिएको थियो । अदालतको आदेशलगत्तै कारागार चलान भएका उनले त्यहाँ १० महिना समय बिताएका छन् ।
त्यसयता भने बिरामी भएको बाहनामा अस्पतालमै आफन्त भेट्ने गरेका रौनियारले सहकारी पीडितलाई फोनमार्फत् धम्की दिने गरेको स्रोतले जनाएको छ । स्रोतका अनुसार रौनियारले सहकारी पीडितहरूलाई आफूविरुद्धको मुद्दा फिर्ता लिन भन्दै थर्काउने गरेका छन् । ‘उहाँ अहिले अस्पताल बसेरै फोनमार्फत् सहकारी पीडितलाई थर्काउन लागिपर्नुभएको रहेछ,’ स्रोत भन्छ, ‘राजनीतिक आडमा सहकारी ठगेर रकम कुम्ल्याएको छ भन्दैमा त्यति ज्याजति गर्न पाइन्छ ? यहाँ सबैको मिलेमतो छ ।’
उपचार खर्च मात्रै अढाइ लाख नाघ्यो
मोरङ प्रहरीले रौनियार र सार्वजनिक लेखा समितिका पूर्वसभापति ऋषिकेश पोखरेलकी पत्नी अञ्जना कोइरालासहित २६ जनालाई प्रतिवादी बनाएर गत वर्षको मंसिर २७ गते सहकारीको रकम अपचलन मुद्दा अदालतमा दर्ता गरेको थियो । त्यसपछि पक्राउ परेर पुर्पक्षका लागि कारागार चलान भएका रौनियार कारागार प्रशासनलाई समेत टेर्दैनन् । प्रशासनलाई नटेरी निजी अस्पताल बसेर मुटुसम्बन्धी रोगको उपचार गराइरहेका पूर्वअध्यक्ष रौनियारको उपचार खर्च अढाइ लाख रुपैयाँ नाघिसकेको छ । महँगो क्याबिनमा बसेका रौनियारले अस्पतालको बिलमा उठेको रकम पनि किस्ता–किस्तामा तिरिहेका छन् ।
‘कहिले दुई हजार त कहिले चार हजार रुपैयाँ गरेर उहाँले उपचार खर्च तिर्दै हुनुहुन्छ,’ अस्पताल प्रशासन भन्छ, ‘बिल धेरै उठेको छ । हामीले डिस्चार्ज लिएर अलि–अलि तिर्दै गर्न पनि सुझाव दिएका छौं । तर, त्यसो पनि गर्नुभएको छैन ।’ रकम जोहो गर्न नसकेर रौनियारले अस्पताल छोड्न नसकेको हो कि भन्ने अस्पताल प्रशासनको आँकलन छ । तथापि, यसबारे रौनियारले केही खुलाएका छैनन् ।
विभेदमा कैदीबन्दी
मोरङ कारागारमा हाल एक हजारभन्दा बढी कैदीबन्दी छन् । त्यसमध्ये धेरै कैदी कुनै न कुनै स्वास्थ्य समस्याबाट ग्रसित छन् । तर, पैसा र पहुँच हुनेहरूले राजनीतिक संरक्षणलाई आड बनाएर यसरी निजी स्वास्थ्य संस्थामा उपचारको बाहना गर्दै कारागारको समय छलिरहँदा नहुने कैदीबन्दीको अवस्था दयनीय छ । पार्टीको संलग्नतालाई भजाएर कारागारको सट्टा अस्पतालमा बसेर सहकारी पीडितलाई थर्काउँदा आफूहरूको मनोबल गिरेको कैदीबन्दीको दुःखेसो छ ।
‘म केही समयअघि क्षयरोगले ग्रस्त थिएँ, घरपरिवारलाई थाहा नदिँदा आर्थिक अभाव उत्तिकै सताएको थियो,’ एक कैदीबन्दी भन्छन्, ‘उपचारका लागि मैले सबै निकायमा गुहार्दा–गुहार्दा बल्ल बल्ल सरकारी अस्पतालबाट उपचार पाएँ । तर, यहाँ मुटु दुखेको भन्दै कैदीबन्दीहरू महिनौं निजी अस्पताल बसिदिने रहेछन्, त्यो पनि पावर र पैसाको बलमा ।’
